2025 වසරේ අගභාගයේදී මෙරටට බලපෑ අයහපත් කාලගුණික තත්ත්වය හේතුවෙන් හානියට පත් වූ තේ, රබර් සහ පොල් වගාවන් නැවත නගාසිටුවීම සඳහා විශේෂ සහන පැකේජයක් ලබා දීමට අමාත්ය මණ්ඩලයේ අනුමැතිය හිමිව තිබේ. අමාත්ය නලින්ද ජයතිස්ස මහතා ප්රකාශ කළේ මෙම නව සහන ක්රමය යටතේ හානියට පත් වූ වගා බිම්වල ප්රමාණය සැලකිල්ලට ගනිමින් ගොවීන් වෙත සෘජු මූල්ය ආධාර ලබා දීමට රජය පියවර ගන්නා බවයි. මෙරට ප්රධාන අපනයන ආදායම් මාර්ග වන වැවිලි ක්ෂේත්රයේ වගාකරුවන් දිරිමත් කිරීම සහ ඔවුන් මුහුණ දී ඇති ආර්ථික දුෂ්කරතා අවම කිරීම රජයේ මූලික අරමුණ වී ඇත.
මෙම සහන ක්රමය යටතේ පොල් වගාව සඳහා හෙක්ටයාරයකට රුපියල් 750,000ක් දක්වා වූ උපරිම මූල්ය සහනයක් හිමිවන අතර, තේ වගාව සඳහා හෙක්ටයාරයකට රුපියල් 500,000ක උපරිමයකට යටත්ව ආධාර ලබා දීමට නියමිතය. රබර් වගාව සඳහා හෙක්ටයාරයකට රුපියල් 400,000ක් දක්වා උපරිම සහනයක් හිමිවේ. වැවිලි හා ප්රජා යටිතල පහසුකම් අමාත්යාංශය විසින් සිදු කරන ලද විද්යාත්මක හානි තක්සේරුවලින් පසුව මෙම ගෙවීම් සිදු කරන ලෙස මහා භාණ්ඩාගාරයට නිර්දේශ කර ඇති බව අමාත්යවරයා වැඩිදුරටත් සඳහන් කළේය.
මීට පෙර වී, එළවළු සහ පලතුරු වගාවන් සඳහා සහන ලබා දීමට රජය අනුමැතිය ලබා දී තිබූ අතර, ගම්මිරිස්, කෝපි සහ කරාබුනැටි වැනි කුඩා අපනයන භෝග වගා කරන ගොවීන්ට ප්රතිලාභ බෙදා දීමේ ක්රියාවලිය ද මේ වන විටත් ආරම්භ කර තිබේ. මෙම පුළුල් සහන වැඩපිළිවෙළ හරහා කෘෂිකාර්මික ක්ෂේත්රයේ ස්ථාවරත්වය තහවුරු කිරීමටත්, ඉදිරි වසරවලදී අපනයන ධාරිතාව ඉහළ නැංවීමටත් රජය අපේක්ෂා කරයි.
