ශ්රී ලංකාවේ දැනට පවතින 36%ක ඉහළ පුද්ගල ආදායම් බදු ප්රතිශතය සහ අධික රජයේ නිවාඩු දින සංඛ්යාව මෙරට ආයෝජන දිරිගැන්වීමට සහ ආර්ථිකය යථා තත්ත්වයට පත් කිරීමට දැඩි බාධාවක් එල්ල කරන බව ප්රසිද්ධ ව්යාපාරික ඩඩ්ලි සිරිසේන මහතා පවසයි. ගාල්ලේ පැවැති උත්සවයක් අමතමින් ඔහු සඳහන් කළේ මැදපෙරදිග පවතින යුදමය වාතාවරණය හමුවේ ගෝලීය වශයෙන් ඇති වී තිබෙන අවිනිශ්චිතතාව මධ්යයේ මෙරට ආර්ථිකය දැඩි අභියෝගයකට මුහුණ දී ඇති බවයි. වර්තමාන රජය ආර්ථික අර්බුදයෙන් මිදීමට පැහැදිලි උත්සාහයක නිරත වුවද, රජය සහ ව්යාපාරික ප්රජාව අතර ශක්තිමත් සහයෝගීතාවක් සහ අවබෝධයක් පැවතීම මේ සඳහා අත්යවශ්ය සාධකයක් බව ඔහු වැඩිදුරටත් අවධාරණය කළේය.
ශ්රී ලංකාව තුළ විවිධ උත්සව සහ සැමරුම් පදනම් කරගනිමින් පවතින අධික නිවාඩු දින සංඛ්යාව මෙරට නිෂ්පාදන පිරිවැය ඉහළ නැංවීමටත්, ආර්ථික ක්රියාවලියේ ඵලදායිතාව අඩු කිරීමටත් හේතු වන බව සිරිසේන මහතා පෙන්වා දුන්නේය. ව්යාපාරිකයන් ජාතික ආර්ථිකය නැවත ගොඩනැඟීමට සහාය දීමට සූදානම් වුවද, පවතින බදු ව්යුහය හේතුවෙන් නැවත ආයෝජනය කිරීම සඳහා ඇති උනන්දුව අඩුවන බවත්, එබැවින් ආදායම් උත්පාදනය සහ ආයෝජන දිරිගැන්වීම අතර සමබරතාවක් පවත්වා ගැනීම ප්රතිපත්ති සම්පාදකයින්ගේ වගකීමක් බවත් ඔහු සඳහන් කළේය. විශේෂයෙන්ම ගාල්ල ඇතුළු දකුණු පළාතේ සංචාරක කර්මාන්තය නිසි ලෙස සංවර්ධනය කළහොත් මෙරටට අවශ්ය විදේශ විනිමය උපයා ගැනීමට එය විශාල පිටුවහලක් වනු ඇති බව ද ඔහු මෙහිදී වැඩිදුරටත් පැවසීය.
