මැදපෙරදිග කලාපයේ පවතින යුදමය වාතාවරණය හේතුවෙන් ශ්රී ලංකාවේ ආර්ථිකයට එල්ල විය හැකි අහිතකර බලපෑම් කළමනාකරණය කිරීම සඳහා ජනාධිපති අනුර කුමාර දිසානායක මහතාගේ උපදෙස් මත පිහිටුවන ලද “ආර්ථික ආවේක්ෂණ කමිටුව” අද (11) ජනාධිපති කාර්යාලයේදී රැස් විය. නියෝජ්ය අමාත්ය ආචාර්ය අනිල් ජයන්ත ප්රනාන්දු මහතාගේ සභාපතිත්වයෙන් යුත් මෙම කමිටුවට මහබැංකු අධිපතිවරයා ඇතුළු ක්ෂේත්ර ගණනාවක ප්රධානීන් ඇතුළත් වේ.
ඉන්ධන ආනයනය, මැදපෙරදිග සේවය කරන ශ්රමිකයන්ගෙන් ලැබෙන විදේශ ප්රේෂණ සහ එම කලාපය සමඟ පවතින වාණිජ සබඳතා මත ශ්රී ලංකාව දැඩි ලෙස රඳා පවතින බැවින්, පවතින යුදමය තත්ත්වය හමුවේ ඇති විය හැකි අවදානම් පිළිබඳව මෙහිදී දීර්ඝ ලෙස සාකච්ඡා කෙරිණි. ගෝලීය බලශක්ති අර්බුදය හමුවේ දේශීය වෙළඳපොළේ භාණ්ඩ හා සේවා මිල ගණන් ස්ථාවරව පවත්වා ගැනීමට ගත යුතු කඩිනම් ප්රතිපත්තිමය ක්රියාමාර්ග හඳුනාගත් අතර, කුඩා විවෘත ආර්ථිකයක් සහිත ශ්රී ලංකාව බාහිර ආර්ථික කම්පනවලට නිරාවරණය වීමේ අවදානම අවම කිරීම සඳහා දෛනිකව තත්ත්වය අධීක්ෂණය කිරීමට ද තීරණය විය. මෙම රැස්වීම සඳහා භාණ්ඩාගාර ලේකම් ආචාර්ය හර්ෂණ සූරියප්පෙරුම, හාන්ස් විජයසූරිය, දුමින්ද හුලංගමුව මෙන්ම තෙල් සංස්ථාව, ලිට්රෝ ගෑස් සහ වරාය අධිකාරියේ සභාපතිවරුන් ඇතුළු පිරිසක් එක්ව සිටි අතර, මැදපෙරදිග යුද්ධය නිසා මෙරට ජනතාවට සිදුවන බලපෑම අවම කිරීමට අවශ්ය නිර්දේශ ජනාධිපතිවරයා වෙත කඩිනමින් ඉදිරිපත් කිරීමට නියමිතය.
