පවතින බලශක්ති අර්බුදය කළමනාකරණය කිරීම සඳහා අත්යවශ්ය සේවා කොමසාරිස් ජනරාල් බී.කේ. ප්රභාත් චන්ද්රකීර්ති මහතා විසින් අද (30) පස්වරුවේ අලුත් මාර්ගෝපදේශ මාලාවක් නිකුත් කර තිබේ. මෙමඟින් රාජ්ය මෙන්ම පෞද්ගලික අංශයට ද බලශක්ති සංරක්ෂණය සඳහා දැඩි උපදෙස් ලබා දී ඇත.
සියලුම රාජ්ය සහ ව්යවස්ථාපිත ආයතනවල වායු සමීකරණ යන්ත්ර (AC) පස්වරු 3.00 වන විට අක්රිය කළ යුතුය. වෙළෙඳ දැන්වීම් පුවරු සහ ඩිජිටල් තිර රාත්රී 8.00න් පසු නිවා දැමිය යුතුය. පළාත් පාලන ආයතන යටතේ ඇති වීදි ලාම්පු පස්වරු 6.00 සිට රාත්රී 10.00 දක්වා කාලය තුළ නිවා දැමීමට විශේෂ වැඩසටහන් ක්රියාත්මක කළ යුතුය. පුද්ගලයන් 100කට වැඩි පිරිසක් සහභාගී වන උත්සව හෝ සංගීත සංදර්ශන සඳහා ජාතික විදුලි පද්ධතිය භාවිත නොකර විකල්ප බලශක්ති ක්රම භාවිත කළ යුතුය.
මෙම පියවර මඟින් ඉදිරි වියළි කාලගුණික තත්ත්වය හමුවේ විදුලි කප්පාදුවක් වළක්වා ගැනීමට රජය උපරිම උත්සාහයක නිරත වන බව අත්යවශ්ය සේවා කොමසාරිස් ජනරාල්වරයා වැඩිදුරටත් අවධාරණය කළේය.
