මැදපෙරදිග කලාපයේ පවතින දේශපාලන අස්ථාවරත්වය සහ යුදමය වාතාවරණය හේතුවෙන් ලෝක වෙළෙඳපොළේ යූරියා පොහොර මිල ශීඝ්රයෙන් ඉහළ ගොස් ඇති බව විදෙස් මාධ්ය වාර්තා කරයි. ඒ අනුව, ඇමෙරිකා එක්සත් ජනපදයේ නිව් ඕර්ලියන්ස් (New Orleans) වෙළෙඳපොළේ කැටිති යූරියා ටොන් එකක මිල ඇමෙරිකානු ඩොලර් 600 සීමාව ඉක්මවා ගොස් ඇති අතර, මෙය වසර තුනකට වැඩි කාලයකට පසු වාර්තා වූ ඉහළම මිල අගය ලෙස සැලකේ.
මිල ඉහළ යාමට බලපෑ හේතු:
2022 වසරේ රුසියානු-යුක්රේන යුද්ධය ආරම්භ වීමත් සමඟ පොහොර මිල වාර්තාගත ලෙස ඉහළ ගිය අතර, ඉන්පසු 2023 සහ 2024 වසරවල මිල යම් මට්ටමකට ස්ථාවරව පැවතුණි. එහෙත් වත්මන් මැදපෙරදිග අර්බුදය හමුවේ ස්වභාවික වායු සැපයුමට එල්ල වී ඇති බාධා සහ ප්රවාහන වියදම් ඉහළ යාම මෙම මිල ඉහළ යාමට සෘජුවම බලපා ඇත. විශේෂයෙන්ම හෝමුස් සමුද්ර සන්ධිය වැනි ප්රධාන මුහුදු මාර්ගවල පවතින අවදානම හේතුවෙන් පොහොර ප්රවාහනය ප්රමාද වීම ද මෙම තත්ත්වය තවදුරටත් දැඩි කිරීමට හේතු වී තිබේ.
මෙම මිල ඉහළ යාම ශ්රී ලංකාව වැනි කෘෂිකාර්මික රටවලට දැඩි බලපෑමක් එල්ල කරනු ඇතැයි අපේක්ෂා කෙරේ. දැනටමත් යල කන්නය සඳහා අවශ්ය පොහොර තොගවල පවතින හිඟය පිළිබඳව ජාතික ගොවිජන එකමුතුවේ සභාපති අනුරාධ තෙන්නකෝන් මහතා කළ අනතුරු ඇඟවීමත් සමඟ, ලෝක වෙළෙඳපොළේ මෙම මිල ඉහළ යාම දේශීය පොහොර මිල කෙරෙහි ද සෘජුවම බලපානු ඇත.
