ශ්රී ලංකාව සහ ෆින්ලන්තය අතර 1954 වසරේ සිට පවතින රාජ්යතාන්ත්රික සබඳතා තවදුරටත් ශක්තිමත් කරමින්, දෙරට අතර ද්විපාර්ශ්වික දේශපාලන උපදේශන සාකච්ඡාවල දෙවන වටය 2026 පෙබරවාරි 25 වැනි දින ෆින්ලන්තයේ හෙල්සින්කි නුවරදී සාර්ථකව නිම විය. මෙම සාකච්ඡාවල සුවිශේෂී සන්ධිස්ථානයක් ලෙස, දෙරට අතර දේශපාලන උපදේශන යාන්ත්රණයක් ස්ථාපිත කිරීම පිළිබඳ අවබෝධතා ගිවිසුමක් (MoU) අත්සන් කරන ලද අතර, එමඟින් දෙරට අතර දේශපාලන සංවාදය සහ සහයෝගීතාව සඳහා විධිමත් හා ව්යුහගත පදනමක් සකස් කෙරිණි.
2018 වසරේ පැවැති පළමු වටයේ සිට ලබා ඇති ප්රගතිය සමාලෝචනය කළ මෙම සාකච්ඡාවලදී වෙළෙඳාම, ආයෝජන, සංචාරක ව්යාපාරය සහ සංවර්ධන සහයෝගීතාව පිළිබඳව දීර්ඝ වශයෙන් අවධානය යොමු විය. විශේෂයෙන්ම වෘත්තීය අධ්යාපනය සහ පුහුණුව (VET), සමුද්රීය ක්ෂේත්රයේ සහයෝගීතාව, නාවික පුහුණු සුදුසුකම් අන්යෝන්ය වශයෙන් පිළිගැනීම සහ කාලගුණ විද්යාත්මක දත්ත හුවමාරු කර ගැනීම වැනි නව සහ නැගී එන ක්ෂේත්ර කිහිපයක් සහයෝගීතාව සඳහා හඳුනා ගන්නා ලදී.
ශ්රී ලංකා දූත පිරිස ෆින්ලන්තයේ වෙසෙන ශ්රී ලාංකික සිසුන් සහ වෘත්තිකයන් මුහුණ දෙන වීසා ගැටලු පිළිබඳව ද කරුණු ඉදිරිපත් කළහ. එහිදී අධ්යාපනය සහ රැකියා සඳහා වීසා ලබා ගැනීමේ ක්රියාවලිය කඩිනම් කිරීමේ අවශ්යතාව අවධාරණය කළ අතර, ඒ සඳහා කොළඹ වීසා මධ්යස්ථානයක් පිහිටුවීම කෙරෙහි අවධානය යොමු කරන ලෙස ෆින්ලන්ත පාර්ශවයෙන් ඉල්ලා සිටින ලදී. මීට අමතරව, යුරෝපා සංගමය සමඟ පවතින GSP Plus සහන සම්බන්ධයෙන් සහ ‘දිට්වා’ සුළි කුණාටුවෙන් පසුව එක්සත් ජාතීන්ගේ මධ්යම හදිසි ප්රතිචාර අරමුදල (UN CERF) හරහා ෆින්ලන්තය ලබා දුන් සහයෝගයට ද ශ්රී ලංකාව සිය කෘතඥතාව පළ කළේය. විදේශ කටයුතු අමාත්යාංශයේ අධ්යක්ෂ ජනරාල් සුගීෂ්වර ගුණරත්න මහතා සහ ෆින්ලන්ත විදේශ අමාත්යාංශයේ අධ්යක්ෂ ජනරාල් ජාරි සින්කාරි මහතා මෙම සාකච්ඡා සඳහා නායකත්වය ලබා දුන්හ.
