ශ්රී ලංකාව සහ ජර්මනිය අතර පවතින ද්විපාර්ශ්වික සබඳතා තවදුරටත් ශක්තිමත් කිරීමේ අරමුණින් විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා පසුගියදා ජර්මනියේ බ්රේමන් නගරයේ නිල සංචාරයක නිරත විය. ජර්මානු ආසියා-පැසිෆික් ව්යාපාරික සංගමයේ (OAV) බ්රේමන් ශාඛාවේ 125 වැනි සංවත්සරයට ප්රධාන කථිකයා ලෙස සහභාගී වීමට ලැබීම මෙම සංචාරයේ විශේෂත්වයකි.
අමාත්ය විජිත හේරත් මහතා සහ ජර්මනියේ විදේශ අමාත්ය ආචාර්ය යොහාන් වාඩෆූල් මහතා අතර පැවැති හමුවේදී දෙරට අතර වෙළඳාම, ආයෝජන සහ සංචාරක කර්මාන්තය ප්රවර්ධනය කිරීම පිළිබඳව දීර්ඝ වශයෙන් සාකච්ඡා විය. විශේෂයෙන්ම ජර්මානු භාෂා පුහුණුව ඉහළ නැංවීම සහ වෘත්තීය අධ්යාපනය හරහා ශ්රී ලාංකිකයන්ට ජර්මනියේ රැකියා අවස්ථා ලබා ගැනීම කෙරෙහි මෙහිදී අවධානය යොමු විය
යුනෙස්කෝ ලෝක උරුමයක් වන බ්රේමන් නගර ශාලාවේදී ජර්මානු ව්යාපාරික නායකයින් ඇමතූ අමාත්යවරයා, ශ්රී ලංකාවේ උපායමාර්ගික පිහිටීම සහ උගත් ශ්රම බලකාය ආයෝජන සඳහා කෙතරම් ආකර්ෂණීය ද යන්න පැහැදිලි කළේය. වරාය සහ සැපයුම් කර්මාන්තය (Logistics) සම්බන්ධයෙන් ශ්රී ලංකාව සතු හැකියාවන් ගවේෂණය කරන ලෙස ඔහු එහිදී ජර්මානු සමාගම්වලට ආරාධනා කළේය.
අපනයන සංවර්ධන මණ්ඩලයේ සභාපති මංගල විජේසිංහ මහතා ද මෙම සංචාරයට එක්ව සිටි අතර, ඉදිරියේදී පැවැත්වීමට නියමිත ‘2026 ශ්රී ලංකා එක්ස්පෝ’ ප්රදර්ශනය සඳහා ජර්මානු ව්යාපාරික ප්රජාවට නිල වශයෙන් ආරාධනා කරන ලදී.
බ්රේමන් නගරාධිපති ආචාර්ය ඇන්ඩ්රියාස් බෝවන්ෂුල්ට මහතා සමඟ පැවැති සාකච්ඡාවේදී මෝටර් රථ කර්මාන්තය සහ සැපයුම් අංශයන්හි සහයෝගීතාවය පිළිබඳව විශේෂ අවධානයක් යොමු කෙරිණි. මෙම සංචාරය සඳහා ජර්මනියේ ශ්රී ලංකා තානාපතිනී වරුණි මුතුකුමාරණ මහත්මිය ද සහභාගී වූවාය.
