මැදපෙරදිග පවතින දරුණු යුදමය වාතාවරණය සහ ශ්රී ලංකාවට ආසන්න මුහුදේ ඉරාන නෞකාවකට එල්ල වූ ප්රහාරය හමුවේ රටේ ආරක්ෂාව තහවුරු කිරීමට ජනාධිපති අනුර කුමාර දිසානායක මහතා වහාම හිටපු ජනාධිපතිවරුන්ගේ සහාය ලබාගත යුතු බව හිටපු පාර්ලිමේන්තු මන්ත්රී තිස්ස කුට්ටිආරච්චි මහතා පවසයි. අද (05) එප්පාවල ප්රදේශයේදී මාධ්ය වෙත අදහස් දක්වමින් ඔහු සඳහන් කළේ, වත්මන් ජනාධිපතිවරයාට අත්දැකීම් නොමැති වීම නිසා ලෝකය හමුවේ රට වරද්දවා ගැනීමේ අවදානමක් පවතින බවයි. මහින්ද රාජපක්ෂ, රනිල් වික්රමසිංහ, මෛත්රීපාල සිරිසේන සහ චන්ද්රිකා බණ්ඩාරනායක යන හිටපු ජනාධිපතිවරුන් සිව්දෙනා සහ වත්මන් ජනාධිපතිවරයා එක්ව සාමූහික තීරණ ගත යුතු මොහොතක් එළඹ ඇති බව ඔහු අවධාරණය කළේය.
වත්මන් රජයට රාජ්ය ආරක්ෂාව පිළිබඳ වැටහීමක් නොමැති බවට චෝදනා කළ කුට්ටිආරච්චි මහතා, ජනාධිපතිවරයා මේ වන විට දැඩි මානසික ආතතියකින් පසුවන බවත් ඒ හරහා ගන්නා තීරණ රටට අහිතකර විය හැකි බවත් පැවසීය. විශේෂයෙන්ම ඉරාන නාවිකයන් බේරා ගැනීම වැනි මානුෂීය කටයුතු ජාත්යන්තර දේශපාලනයේදී අනෙක් පාර්ශවයන් දකින ආකාරය පිළිබඳව උපක්රමශීලී විය යුතු බව ඔහු පෙන්වා දුන්නේය. මාතෘ භූමිය බේරා ගැනීම වෙනුවෙන් ඕනෑම කොන්දේසි විරහිත සහායක් ලබා දීමට ශ්රී ලංකා පොදුජන පෙරමුණ සූදානම් බව ද හිටපු මන්ත්රීවරයා මෙහිදී වැඩිදුරටත් සඳහන් කළේය.
