මැදපෙරදිග කලාපයේ පවතින යුදමය වාතාවරණය සහ ගුවන් ගමන් අවලංගු වීම් හමුවේ ශ්රී ලංකාවේ රැඳී සිටින විදේශීය සංචාරකයන්ගේ ආරක්ෂාව සහ සුබසාධනය තහවුරු කිරීම සඳහා ශ්රී ලංකා සංචාරක සංවර්ධන අධිකාරිය (SLTDA) විසින් විශේෂ ආරක්ෂක සහ සහන රාමුවක් ප්රකාශයට පත් කර තිබේ. විශේෂයෙන්ම ඉරානය, ඉරාකය ඇතුළු මැදපෙරදිග රටවලින් පැමිණි සංචාරකයන්ට සිය මව්බිම් බලා යාමට නොහැකිව පවතින අපහසුතාවයන් මගහරවා ගැනීම සඳහා මෙම හදිසි පියවර ක්රියාත්මක වේ. ශ්රී ලංකාව තුළ තත්ත්වය ස්ථාවරව පැවතියද, ගෝලීය තත්ත්වයන් මත පීඩාවට පත් සංචාරකයන් වෙනුවෙන් රජය මෙම මැදිහත්වීම සිදු කර ඇත.
ගුවන් ගමන් අවලංගු වීම් හේතුවෙන් මෙරට රැඳී සිටීමට සිදුවන සියලුම විදේශීය සංචාරකයන් සඳහා දින 14ක නොමිලේ වීසා බලපත්ර දීර්ඝ කිරීමක් රජය විසින් අනුමත කර තිබේ. මීට අමතරව, සංචාරක නවාතැන්පොළවල් සහ සංචාරක නියෝජිතයන් වෙත උපදෙස් ලබා දී ඇත්තේ පිටත්ව යාමට සිටින අමුත්තන් සඳහා නම්යශීලී නවාතැන් පහසුකම් සැපයීමටත්, ගුවන් ගමන් වෙනස්වීම් පිළිබඳව නිරන්තර අවධානයෙන් පසුවීමටත්ය. පිටත්ව යාමට නොහැකිව සිටින සංචාරකයන් හඳුනා ගැනීම සඳහා ලියාපදිංචි සංචාරක ආයතන හරහා දත්ත රැස්කිරීමේ යාන්ත්රණයක් ද මේ වන විට ස්ථාපිත කර ඇත.
සංචාරකයන්ට අවශ්ය තොරතුරු සහ සහාය ලබා දීම සඳහා පැය 24 පුරා ක්රියාත්මක හදිසි ඇමතුම් අංක කිහිපයක් හඳුන්වා දී ඇත. ඒ අනුව සංචාරක හදිසි ඇමතුම් සඳහා 1912 අංකයත්, ගුවන් තොටුපොළ තොරතුරු සඳහා 1994 අංකයත්, ශ්රී ලංකන් ගුවන් සේවය සම්බන්ධ කර ගැනීමට 1979 අංකයත් භාවිත කළ හැකිය. තවද, සංචාරක පොලිසිය සමඟ එක්ව දිවයිනේ ප්රධාන සංචාරක කලාපවල ආරක්ෂාව තවදුරටත් තර කිරීමට ද කටයුතු යොදා තිබේ.
