ජාතික ඉන්ධන බලපත්ර පද්ධතිය (National Fuel Pass) යටතේ ඉන්ධන ලබාගැනීමේදී වාහනයක අනන්යතාවය තහවුරු කිරීම සඳහා ඉදිරිපත් කළ හැකි පිළිගත් ලේඛන මොනවාද යන්න පිළිබඳව මෝටර් රථ ප්රවාහන දෙපාර්තමේන්තුව (DMT) විශේෂ ප්රකාශයක් නිකුත් කර තිබේ. ඒ අනුව, වාහනයක අනන්යතාවය නිවැරදිව තහවුරු කිරීම සඳහා වාහන ආදායම් බලපත්රය, වාහන ලියාපදිංචි සහතිකය (පොත), වාහන රක්ෂණ සහතිකය හෝ වාහන දුම් පරීක්ෂණ වාර්තාව යන ලේඛනවලින් එකක් ඉදිරිපත් කළ හැකි බව එම දෙපාර්තමේන්තුව දැනුම් දෙයි. මෝටර් රථ ප්රවාහන කොමසාරිස් ජනරාල්වරයා සඳහන් කළේ ලංකා ඛනිජ තෙල් නීතිගත සංස්ථාව (CPC) වාහන අංක තහඩුවේ අවසන් ඉලක්කම අනුව ඉන්ධන නිකුත් කිරීමට පියවර ගනිමින් සිටින බැවින් මෙම පියවර ගත් බවයි.
ප්රසම්පාදන ගැටලු හේතුවෙන් මෑත කාලයේදී වාහන අංක තහඩු නිකුත් කිරීම අඩාල වී ඇති බැවින්, ඇතැම් වාහන හිමියන්ට විකල්ප අංක තහඩු භාවිතා කිරීමට සිදුව ඇති බවත්, එවැනි අවස්ථාවලදී ඉහත සඳහන් කළ ලේඛනයක් ඉදිරිපත් කිරීමෙන් වාහනයේ අනන්යතාවය තහවුරු කරගත හැකි බවත් මෝටර් රථ ප්රවාහන දෙපාර්තමේන්තුව වැඩිදුරටත් සඳහන් කරයි. මේ අතර, ලංකා ඛනිජ තෙල් නීතිගත සංස්ථාව විසින් අද (19) සිට ක්රියාත්මක වන පරිදි ‘ඔත්තේ – ඉරට්ටේ’ (Odd-Even) ක්රමවේදය යටතේ ඉන්ධන අලෙවි කිරීමට තීරණය කර ඇති බවද නිවේදනය කර තිබේ.
නව ක්රමවේදය යටතේ, වාහන අංක තහඩුවේ අවසන් ඉලක්කම 0, 2, 4, 6 සහ 8 වන ඉරට්ටේ අංක සහිත වාහන සඳහා ඉරට්ටේ දිනවලදී (උදා: මාර්තු 20, 22) ඉන්ධන ලබාගත හැකි අතර, අවසන් ඉලක්කම 1, 3, 5, 7 සහ 9 වන ඔත්තේ අංක සහිත වාහන සඳහා ඔත්තේ දිනවලදී (උදා: මාර්තු 19, 21) ඉන්ධන ලබා ගැනීමට අවසර හිමිවේ. මෙම පියවර මගින් ඉන්ධන පිරවුම්හල් අසල පවතින තදබදය අවම කිරීමට බලධාරීන් අපේක්ෂා කරයි.
