ලෝක වෙළඳපොළේ බොරතෙල් සහ පිරිපහදු කළ ඉන්ධන මිල ශීඝ්රයෙන් ඉහළ යාම මෙන්ම දේශීය පරිභෝජනය අසාමාන්ය ලෙස වැඩිවීම හේතුවෙන් ඉන්ධන මිල ඉහළ දැමීමට රජයට සිදු වූ බව කැබිනට් ප්රකාශක අමාත්ය නලින්ද ජයතිස්ස මහතා පවසයි. අද පැවැති කැබිනට් තීරණ දැනුම් දීමේ මාධ්ය හමුවේදී අදහස් දක්වමින් අමාත්යවරයා අවධාරණය කළේ පවතින ගෝලීය තත්ත්වය අනුව ඉන්ධන මිල මීට වඩා වැඩි විය යුතු වුවද, ජනතාවට සහ ආර්ථිකයට එල්ල වන පීඩනය සැලකිල්ලට ගෙන එය යම් මට්ටමක පවත්වා ගැනීමට රජය උත්සාහ කළ බවයි. පසුගිය මාර්තු 01 වැනිදා සිට 09 වැනිදා දක්වා කාලය තුළ මෙරට ඩීසල් සහ පෙට්රල් පරිභෝජනය සාමාන්ය මට්ටමට වඩා පිළිවෙළින් මෙට්රික් ටොන් 23,000කින් සහ 13,000කින් පමණ ඉහළ ගොස් ඇති අතර, මෙම අධික පරිභෝජනය නිසා තිබූ සංචිත ඉක්මනින් අවසන් වී ඉහළ මිලකට අලුතින් ඉන්ධන ආනයනය කිරීමට සිදු වූ බව හෙතෙම පෙන්වා දුන්නේය.
ලෝක වෙළඳපොළේ බොරතෙල් මිල මාර්තු 08 වැනිදා පැවති ඩොලර් 108 සිට මාර්තු 09 වන විට ඩොලර් 119 දක්වා ඉහළ ගොස් ඇති බවත්, පිරිපහදු කළ ඉන්ධන මිල 75% සිට 99% දක්වා ප්රතිශතයකින් වැඩි වී ඇති බවත් අමාත්යවරයා අනාවරණය කළේය. විශාල මිල වැඩි කිරීමක් එකවර සිදු කිරීම ආර්ථිකයට දරාගත නොහැකි බැවින් පියවරෙන් පියවර මෙම සංශෝධන සිදු කරන බව පැවසූ ඔහු, මෙම මිල ඉහළ දැමීම හරහා ජනතාව ඉන්ධන පරිභෝජනය යම් මට්ටමකට සීමා කරනු ඇතැයි රජය අපේක්ෂා කරන බව ද සඳහන් කළේය. ලෝකයේ සෙසු රටවල් ද බලශක්ති පරිභෝජනය අවම කිරීමට විවිධ ක්රියාමාර්ග ගෙන ඇති බව පෙන්වා දුන් අමාත්යවරයා, කෙසේ වෙතත් ඉන්ධන සඳහා යම් සහනයක් ලබා දීම පිළිබඳව මුදල් අමාත්යාංශය සමඟ සාකච්ඡා පවත්වමින් සිටින බව ද වැඩිදුරටත් ප්රකාශ කළේය.
