මැදපෙරදිග පවතින දරුණු යුදමය වාතාවරණය සහ ගෝලීය බලශක්ති අර්බුදය හමුවේ ලෝක වෙළඳපොළේ බොරතෙල් මිල ශීඝ්රයෙන් ඉහළ යාම නිසා මෙරට ඉන්ධන මිල සම්බන්ධයෙන් ද කඩිනම් තීරණයක් ගැනීමට සිදුව ඇති බව ජනාධිපති අනුර කුමාර දිසානායක මහතා අද පාර්ලිමේන්තුවේදී ප්රකාශ කළේය. ජනාධිපතිවරයා පෙන්වා දුන්නේ මෙරට ඉන්ධන අවශ්යතාවෙන් 57%ක් ඛනිජ තෙල් නීතිගත සංස්ථාව මගින් සපුරන අතර ඉතිරි 43%ක දායකත්වය පෞද්ගලික අංශය විසින් ලබා දෙන බවයි. පවතින ලෝක වෙළඳපොළ මිල ගණන් අනුව එක් ඉන්ධන නැවකින් පෞද්ගලික සමාගම්වලට ඩොලර් මිලියන 55ක පමණ පාඩුවක් සිදුවන බවත්, එම පිරිවැය ආවරණය වන පරිදි මිල සංශෝධනයක් සිදු නොකරන්නේ නම් ඉන්ධන ආනයනය නතර කිරීමට ඔවුන්ට සිදුවන බවත් ජනාධිපතිවරයා මෙහිදී අනාවරණය කළේය.
විශේෂයෙන්ම ෆුජේරා (Fujairah) වරායට එල්ල වූ ප්රහාර සහ එහි පවතින තත්ත්වය හමුවේ මෙරටට ලැබීමට තිබූ බොරතෙල් මෙට්රික් ටොන් 90,000ක නැව් වාර දෙකක් අහිමි වීම නිසා සැපයුම් ජාලය දැඩි අභියෝගයකට ලක්ව තිබේ. කෙසේ වෙතත් අප්රේල් මාසයේ මුල් සති කිහිපය තුළ ඩීසල්, පෙට්රල්, දැවිතෙල් සහ ගුවන්යානා ඉන්ධන (Jet A1) සහිත නැව් කිහිපයක් මෙරටට ගෙන්වා ගැනීමට දැනටමත් ටෙන්ඩර් පිරිනමා ඇති බව ද ජනාධිපතිවරයා සඳහන් කළේය. ලෝකයේ අනෙකුත් රටවල් සිය ඉන්ධන මිල 6% සිට 50% දක්වා ඉහළ නංවා ඇති පසුබිමක ශ්රී ලංකාව මෙතෙක් සිදු කර ඇත්තේ 8%ක සුළු මිල වැඩි කිරීමක් පමණක් වුවද, පෞද්ගලික අංශයේ දායකත්වය අඛණ්ඩව ලබා ගැනීමට නම් පවතින ඉන්ධන මිල සූත්රයට අනුව ඉදිරියේදී මිල සංශෝධනයක් සිදු කිරීමේ අවශ්යතාව පිළිබඳව රජයේ අවධානය යොමුව ඇති බව ද සභාවේදී වැඩිදුරටත් ප්රකාශ විය.
