ස්ථාන මාරුවීම් ඇතුළු ඉල්ලීම් කිහිපයක් මුල් කරගනිමින් රජයේ වෛද්ය නිලධාරීන්ගේ සංගමය (GMOA) විසින් ආරම්භ කරන ලද පැය 48ක සංකේත වැඩ වර්ජනය හෙට (අප්රේල් 11) උදෑසන අවසන් කරන බව එම සංගමය නිල වශයෙන් ප්රකාශ කර තිබේ. පශ්චාත් සීමාවාසික පත්වීම් සහ මාරුවීම් සම්බන්ධයෙන් සෞඛ්ය අමාත්යාංශය සමඟ ඇති වූ ගැටලුකාරී තත්ත්වයක් මත මෙම වර්ජනය දියත් කර තිබුණි.
වර්ජනය අවසන් කිරීමෙන් පසුව සිය ඉල්ලීම් සම්බන්ධයෙන් ලැබෙන ප්රතිචාර සලකා බලා ඉදිරි වෘත්තීය සමිති ක්රියාමාර්ග පිළිබඳව තීරණය කරන බව එම සංගමය වැඩිදුරටත් සඳහන් කළේය. පසුගිය දින දෙක පුරා ක්රියාත්මක වූ මෙම වර්ජනය හේතුවෙන් දිවයින පුරා රජයේ රෝහල්වල බාහිර රෝගී අංශ ඇතුළු ප්රතිකාර කටයුතුවලට දැඩි බාධා එල්ල වූ අතර, ප්රතිකාර ලබා ගැනීමට පැමිණි රෝගීන් දැඩි දුෂ්කරතාවයට පත් විය.
කෙසේ වෙතත්, සෞඛ්ය අමාත්ය වෛද්ය නලින්ද ජයතිස්ස මහතා අද ප්රකාශ කළේ වර්ජන ක්රියාමාර්ගවලින් බැහැරව සාකච්ඡා සඳහා පැමිණෙන්නේ නම් ඕනෑම අවස්ථාවක සාකච්ඡාවක් ලබා දීමට රජය සූදානම් බවයි. හෙට උදෑසන සිට රෝහල් කටයුතු යථා තත්ත්වයට පත් වනු ඇතැයි බලධාරීන් අපේක්ෂා කරයි.
