මැදපෙරදිග සහ ගල්ෆ් කලාපයේ උද්ගතව ඇති යුදමය වාතාවරණය සහ නොසන්සුන්කාරී තත්ත්වය සැලකිල්ලට ගනිමින්, මෙරට රැඳී සිටින විදේශීය සංචාරකයන්ගේ සහ විදේශයන්හි සේවය කරන ශ්රී ලාංකික ශ්රමිකයන්ගේ ආරක්ෂාව තහවුරු කිරීමට රජය විශේෂ මෙහෙයුම් මාලාවක් දියත් කර තිබේ. අද (01) සවස ජනාධිපති කාර්යාලයේදී පැවැති විශේෂ සාකච්ඡාවකදී මෙම තීරණ ගනු ලැබූ අතර, ඊට සංචාරක නියෝජ්ය අමාත්ය රුවන් රණසිංහ සහ ජනාධිපති ලේකම් ආචර්ය නන්දික සනත් කුමානායක යන මහත්වරුන් ප්රමුඛ රාජ්ය නිලධාරීන් සහ සංචාරක ක්ෂේත්රයේ නියෝජිතයන් පිරිසක් සහභාගී වූහ.
මෙහිදී ගනු ලැබූ ප්රධානතම තීරණයක් වන්නේ දැනට මෙරට රැඳී සිටින විදේශීය සංචාරකයන්ගේ වීසා වලංගු කාලය කිසිදු ගාස්තුවකින් තොරව දින 14කින් (සති දෙකකින්) දීර්ඝ කිරීමයි. මැදපෙරදිග ගුවන් අවකාශයන් වසා දැමීම හේතුවෙන් සිය රටවල් බලා යාමට නොහැකිව සිටින සංචාරකයන්ට සහනයක් ලෙස මෙම පියවර ගෙන ඇත. එසේම, විදේශ අමාත්යාංශය සහ ගුවන් සමාගම් ඒකාබද්ධව විකල්ප ගුවන් ගමන් මාර්ග ඔස්සේ ඔවුන්ව ආරක්ෂිතව පිටත් කර හැරීමටත්, මෙරටට පැමිණීමට අපේක්ෂා කරන සංචාරකයන්ට විකල්ප ගමනාන්ත හඳුන්වා දීමටත් මෙහිදී අවධානය යොමු විය.
හදිසි අවස්ථාවන් සඳහා සහාය වීමට පැය 24 පුරා ක්රියාත්මක සක්රීය මෙහෙයුම් මැදිරි කිහිපයක් ද රජය විසින් ස්ථාපිත කර ඇත. මෙරට රැඳී සිටින සංචාරකයන්ට 1912 ක්ෂණික ඇමතුම් අංකය ඔස්සේ සංචාරක සංවර්ධන අධිකාරිය හා සම්බන්ධ විය හැකි අතර, විදේශයන්හි සිටින ශ්රමිකයන්ගේ තොරතුරු සහ සහාය ලබා ගැනීමට 1989 අංකය ඔස්සේ විදේශ සේවා නියුක්ති කාර්යාංශය හා සම්බන්ධ විය හැකිය. මැදපෙරදිග කලාපයේ පිහිටි සියලුම ශ්රී ලංකා තානාපති කාර්යාල සමඟ එක්ව ඒකාබද්ධ යාන්ත්රණයක් ද මේ වන විට සක්රීය කර තිබේ.
මෙම සාකච්ඡාව සඳහා ආගමන විගමන පාලක ජනරාල්, විදේශ සේවා නියුක්ති කාර්යාංශයේ සභාපති මෙන්ම SLAITO සහ THASL වැනි සංචාරක ක්ෂේත්රයේ ප්රධාන සංගම්වල නියෝජිතයන් ද සහභාගී වී සිටියහ. පවතින තත්ත්වය මත පදනම්ව සංචාරකයන්ගේ අභ්යන්තර ප්රවාහනය සහ අනෙකුත් සුභසාධන කටයුතු බාධාවකින් තොරව පවත්වාගෙන යාමට රජය උපරිම උත්සාහයක් ගන්නා බව ජනාධිපති මාධ්ය අංශය අවධාරණය කරයි.
