ශ්රී ලංකාවේ රෝහල්වල යටිතල පහසුකම් වර්ධනය වීම සැලකිල්ලට ගනිමින්, වෛද්යවරුන් සඳහා ක්රියාත්මක වන “ඌණ පහසුකම් සේවා ස්ථාන” ලැයිස්තුව විද්යාත්මක පදනමක් මත සංශෝධනය කිරීමට සෞඛ්ය අමාත්යාංශය පියවර ගෙන තිබේ. මෙතෙක් පැවති රෝහල් සංඛ්යාව සැලකිය යුතු ලෙස අඩු කරමින් 2026 වසර සඳහා මෙම ලැයිස්තුව රෝහල් 265ක් දක්වා සීමා කර ඇත.
යුද සමයේ උතුරු සහ නැගෙනහිර පළාත්වල සේවය කළ වෛද්යවරුන් සඳහා හඳුන්වා දුන් වසර දෙකක විශේෂ ස්ථාන මාරු සහනය, වර්තමාන සංවර්ධන මට්ටම් අනුව යාවත්කාලීන කර තිබේ. 2020 වසරේදී රෝහල් 407ක් මෙම ලැයිස්තුවට ඇතුළත් වූ අතර, එය 2024 වන විට 393 දක්වා ද, 2026 වසර සඳහා 265 දක්වා ද අඩු වී ඇත. ඌණ පහසුකම් සහිත රෝහලක් ලෙස නම් කිරීම සඳහා ප්රවේශ මාර්ගවල දුෂ්කරතාවය, ප්රධාන නගරයට හෝ පාසලකට ඇති දුර (කිලෝමීටර් 15 ඉක්මවීම), පොදු ප්රවාහන, ජලය, විදුලිය සහ නේවාසික පහසුකම්වල ඌණතාවය මෙන්ම වන සතුන්ගේ තර්ජන වැනි නිර්ණායක සලකා බලනු ලබයි.
වාර්ෂිකව සංශෝධනය වන මෙම ලැයිස්තුව වලංගු වන්නේ එම වසරේ පත්වීම් ලබන ප්රාථමික ශ්රේණියේ වෛද්යවරුන් සඳහා පමණි. ඌණ පහසුකම් සහිත රෝහලක වසර 2ක සක්රීය සේවයකින් පසු විශේෂ ස්ථාන මාරු ක්රමවේදයකට සුදුසුකම් ලැබීමට මෙමගින් වෛද්යවරුන්ට අවස්ථාව හිමි වේ. මෙම නව ලැයිස්තුව ඉදිරියේදී කැබිනට් මණ්ඩලයේ අනුමැතිය සඳහා ඉදිරිපත් කිරීමට නියමිත අතර, දුෂ්කර ප්රදේශවල ජනතාවට බාධාවකින් තොරව වෛද්ය සේවය සැපයීම මෙහි මූලික අරමුණයි.
