බස්නාහිර, සබරගමුව, දකුණ සහ වයඹ පළාත්වලත් මොණරාගල දිස්ත්රික්කයේත් පවතින උණුසුම් කාලගුණ තත්ත්වය හෙට (මාර්තු 11) දිනයේදී තවදුරටත් ඉහළ යනු ඇතැයි කාලගුණ විද්යා දෙපාර්තමේන්තුව අනතුරු අඟවයි. මිනිස් සිරුරට දැනෙන උණුසුම හෙවත් තාප දර්ශකය මෙම ප්රදේශවල ඇතැම් ස්ථානවල ‘අවධානය යොමු කළ යුතු’ මට්ටම දක්වා ඉහළ යා හැකි බව එම දෙපාර්තමේන්තුව අද පස්වරුවේ නිකුත් කළ නිවේදනයක දැක්වේ. සාපේක්ෂ ආර්ද්රතාවය සහ උපරිම උෂ්ණත්වය පදනම් කරගෙන ගණනය කරනු ලබන මෙම තත්ත්වය හේතුවෙන් සිරුරට දැඩි වෙහෙසකාරී බවක් දැනෙනු ඇතැයි අපේක්ෂා කෙරේ.
පවතින අධික උණුසුම හමුවේ දිගු වේලාවක් හිරු එළියට නිරාවරණය වීමෙන් තෙහෙට්ටුව මෙන්ම මස්පිඩු පෙරළීම වැනි සෞඛ්ය ගැටලු ඇතිවීමේ අවදානමක් පවතී. එබැවින් සිරුර විජලනය වීම වැළැක්වීම සඳහා ප්රමාණවත් පරිදි නිතර ජලය පානය කරන ලෙසත් වෙහෙසකර එළිමහන් ක්රියාකාරකම් හැකිතාක් සීමා කරන ලෙසත් සෞඛ්ය අංශ ජනතාවගෙන් ඉල්ලා සිටියි. විශේෂයෙන්ම කුඩා දරුවන්, වැඩිහිටියන් සහ රෝගී පුද්ගලයන් පිළිබඳව මෙම කාලසීමාව තුළ දැඩි අවධානයක් යොමු කිරීම අත්යවශ්ය වේ.
හැකි සෑම විටම සෙවණ ඇති ස්ථානවල රැඳී සිටීමටත් සැහැල්ලු ලා පැහැති ඇඳුම් භාවිත කිරීමටත් වගබලා ගැනීමෙන් මෙම උණුසුම් කාලගුණයෙන් සිදුවන බලපෑම් අවම කරගත හැකිය. කාලගුණ විද්යා දෙපාර්තමේන්තුව වැඩිදුරටත් සඳහන් කරන්නේ ඉදිරි දින කිහිපය තුළ ද මෙම වියළි සහ උණුසුම් කාලගුණික තත්ත්වය දිවයිනේ ප්රදේශ කිහිපයක පවතිනු ඇති බවයි.
