පුද්ගලයින් ලියාපදිංචි කිරීමේ දෙපාර්තමේන්තුවේ (ID Office) ප්රධාන පරිගණක පද්ධතියේ ඇති වූ තාක්ෂණික දෝෂයක් හේතුවෙන් එහි සියලුම සේවා කටයුතු තාවකාලිකව අත්හිටුවා තිබේ. අද (26) පස්වරුවේ සිට මෙම බිඳවැටීම වාර්තා වූ අතර, මේ හේතුවෙන් ජාතික හැඳුනුම්පත් නිකුත් කිරීමේ එක්දින සේවය ඇතුළු සියලුම බාහිර සේවාවන් අඩාල වී ඇති බව වාර්තා වෙයි.
පද්ධතිය යථා තත්ත්වයට පත් කරන තෙක් හැඳුනුම්පත් ලබා ගැනීමට පැමිණෙන ජනතාව දැඩි අපහසුතාවයට පත්ව සිටින අතර, දෝෂය නිවැරදි කිරීම සඳහා තාක්ෂණික කණ්ඩායම් මේ වන විටත් කටයුතු කරමින් සිටින බව දෙපාර්තමේන්තු ආරංචි මාර්ග සඳහන් කරයි. 2026 වසරේදී රජයේ සේවාවන් ඩිජිටල්කරණය කිරීමේ පුළුල් වැඩපිළිවෙළක් ක්රියාත්මක වෙමින් පවතින පසුබිමක, මෙවැනි පද්ධති බිඳවැටීම් සිදුවීම මහජනතාවගේ දැඩි විවේචනයට ලක්ව තිබේ. විශේෂයෙන්ම මැදපෙරදිග අර්බුදය හමුවේ විදේශ රැකියා සඳහා පිටත්ව යාමට සූදානම් වන පිරිස් මෙම ප්රමාදය නිසා දැඩි පීඩාවකට පත්ව සිටිති.
