ජාත්යන්තර මූල්ය අරමුදලේ (IMF) නියෝජිත පිරිසක් සහ ශ්රී ලංකා ජනාධිපති අනුර කුමාර දිසානායක මහතා අතර විශේෂ හමුවක් ජනාධිපති ලේකම් කාර්යාලයේදී පවත්වා තිබෙනවා. ඒ මෙරට ආර්ථික ප්රතිසංස්කරණ වැඩපිළිවෙළේ වත්මන් ප්රගතිය සමාලෝචනය කිරීම සඳහායි.
ජනාධිපති මාධ්ය අංශය සඳහන් කළේ මෙම සාකච්ඡාවේදී මූල්ය අරමුදලේ පස්වන සහ හයවන සමාලෝචනවලට පෙර ශ්රී ලංකාවේ පවතින සූදානම මෙන්ම මෙරට ආර්ථික ප්රකෘතිමත් වීමේ මෑතකාලීන වර්ධනයන් පිළිබඳවද දීර්ඝ ලෙස අවධානය යොමු වූ බවයි. එහිදී මූල්ය අරමුදලේ නියෝජිතයන් ශ්රී ලංකාවේ ආර්ථික වර්ධනය, ආදායම් කළමනාකරණය සහ විදේශ සංචිතවල දක්නට ලැබෙන දියුණුව ඇගයීමට ලක් කළ අතර ශ්රී ලංකාව වඩාත් ස්ථාවර ආර්ථික පදනමකට ගමන් කරමින් සිටින බවද ප්රකාශ කළා.
මීට අමතරව මැදපෙරදිග පවතින යුදමය වාතාවරණය හේතුවෙන් ඉන්ධන මිල සහ බලශක්ති ක්ෂේත්රය ආශ්රිතව ශ්රී ලංකාවේ ආර්ථිකයට එල්ල විය හැකි බාහිර අවදානම් පිළිබඳවද මෙහිදී සාකච්ඡා වී තිබෙනවා. ඊට පිළිතුරු දෙමින් ශ්රී ලංකා බලධාරීන් පවසා ඇත්තේ එම පීඩනයන් කළමනාකරණය කර ගැනීමටත්, පීඩාවට පත්වන අවදානමට ලක්විය හැකි කණ්ඩායම් සඳහා ඉලක්කගත සහන සැලසීමටත් රජය පියවර ගනිමින් සිටින බවයි.
මෙහිදී අදහස් දැක්වූ ජනාධිපතිවරයා අවධාරණය කළේ ශ්රී ලංකාව මේ වන විටත් අදාළ සියලු ඉලක්ක සපුරා සාපේක්ෂව ස්ථාවර මට්ටමකට පැමිණ ඇති බවත්, එම ආර්ථික ප්රතිසංස්කරණ සහ බාහිර අභියෝග මඟින් මහජනතාවට එල්ල වන පීඩාව අවම කිරීම රජයේ අරමුණ බවත්ය.
මෙම අවස්ථාවට ජාත්යන්තර මූල්ය අරමුදල නියෝජනය කරමින් එහි මෙරට දූත මණ්ඩල ප්රධානී එවාන් පැපජෝර්ජියෝ (Evan Papageorgiou) ඇතුළු පිරිසක් සහභාගී වූ අතර ශ්රී ලංකා රජය වෙනුවෙන් මහ බැංකු අධිපති ආචාර්ය පී. නන්දලාල් වීරසිංහ, මුදල් අමාත්යාංශයේ ලේකම් ආචාර්ය හර්ෂණ සූරියප්පෙරුම සහ නියෝජ්ය මුදල් අමාත්ය අනිල් ජයන්ත ප්රනාන්දු යන මහත්වරුන් ඇතුළු උසස් නිලධාරීන් පිරිසක් එක්ව සිටියා.
