මැදපෙරදිග කලාපයේ පවතින යුදමය වාතාවරණය හේතුවෙන් ගෝලීය බලශක්ති සැපයුම් ජාලයන් අඩාල වී ඇති මොහොතක, මෙරට ඉන්ධන අවශ්යතාවය සපුරාලීම සඳහා ඉන්දියාව ලබාදෙන කඩිනම් සහයෝගය ශ්රී ලංකා රජයේ ඉහළ ඇගයීමට ලක්ව තිබේ. විදේශ කටයුතු නියෝජ්ය අමාත්ය අරුණ හේමචන්ද්ර මහතා ANI පුවත් සේවය සමඟ පැවැත්වූ සම්මුඛ සාකච්ඡාවකදී සඳහන් කළේ, ඉන්දීය අග්රාමාත්ය නරේන්ද්ර මෝදි මහතාගේ නායකත්වය යටතේ ලබාදුන් මෙම කාලෝචිත මැදිහත්වීම මෙරට අත්යවශ්ය බලශක්ති පීඩනය අවම කිරීමට බෙහෙවින් ඉවහල් වූ බවයි.
ජනාධිපති අනුර කුමාර දිසානායක මහතා ද මෑතකදී ‘X’ පණිවුඩයක් නිකුත් කරමින් ඉන්දියාවේ මෙම සහයෝගීතාවය කලාපීය ස්ථාවරත්වය තහවුරු කිරීමට මහෝපකාරී වන බව අවධාරණය කළේය. මැදපෙරදිග ගැටුම් හේතුවෙන් ශ්රී ලංකාව මුහුණ දෙන ඉන්ධන සැපයුම් බාධාවන් පිළිබඳව තමන් ඉන්දීය අග්රාමාත්යවරයා සමඟ සාකච්ඡා කළ බවත්, ඒ අනුව මෙට්රික් ටොන් 38,000ක ඉන්ධන තොගයක් ඊයේ කොළඹට ළඟා වූ බවත් ජනාධිපතිවරයා එහිදී සඳහන් කර තිබුණි. මෙම සම්බන්ධීකරණ කටයුතු වෙනුවෙන් ඉන්දීය විදේශ කටයුතු අමාත්ය එස්. ජයශංකර් මහතාට ද ජනාධිපතිවරයා සිය ස්තූතිය පුද කර ඇත.
ඉන්දියාවේ ‘අසල්වැසියා ප්රථමයෙන්’ (Neighbourhood First) යන ප්රතිපත්තිය සහ ‘මහාසාගර්’ (MAHASAGAR) දැක්ම යටතේ මෙම සහයෝගීතාවය ක්රියාත්මක වන බව නියෝජ්ය අමාත්යවරයා පෙන්වා දුන්නේය. ගෝලීය බලශක්ති වෙළඳපොළ දිගින් දිගටම බාධාවන්ට ලක්වෙමින් පවතින පසුබිමක, මෙවැනි කලාපීය හවුල්කාරිත්වයන් විශ්වාසනීය සහ තිරසාර බලශක්ති ප්රවේශයක් සහතික කිරීම සඳහා අත්යවශ්ය වන බව ද හෙතෙම වැඩිදුරටත් ප්රකාශ කළේය. ශ්රී ලංකාව සිය ජාතික අවශ්යතාවලට අනුකූලව සියලුම ජාත්යන්තර හවුල්කරුවන් සමඟ අඛණ්ඩව කටයුතු කිරීමට කැපවී සිටින බව ද රජය අවධාරණය කරයි.
