ශ්රී ලංකාවේ ප්රවාහන සහ යටිතල පහසුකම් සංවර්ධනය කිරීම සඳහා ඉදිරි වසර තුනක කාලය තුළ ඇමරිකානු ඩොලර් බිලියන 8 සිට 10 දක්වා වූ දැවැන්ත මුදලක් ආයෝජනය කිරීමට රජය සැලසුම් කර ඇති බව ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා ප්රකාශ කර තිබෙනවා. අමාත්යවරයා මේ බව කියා සිටියේ රුසියානු රජය විසින් සංවිධානය කරන ලද, රුසියාවේ ශාන්ත පීටර්ස්බර්ග් නුවර පැවැත්වෙන ජාත්යන්තර ප්රවාහන සහ සැපයුම් සංසදයට ශ්රී ලංකාව නියෝජනය කරමින් සහභාගී වූ අවස්ථාවේදීයි. මෙරට යටිතල පහසුකම් නැංවීමේ පියවරක් ලෙස නව වරායන් දෙකක් සහ ගුවන් තොටුපළ සංවර්ධනය කිරීමට රජය සැලසුම් කර ඇති අතර, ඒ සඳහා එක්වන ලෙස ජාත්යන්තර සහ පෞද්ගලික ආයෝජකයන්ට විවෘත ආරාධනාවක්ද සිදු කර තිබෙනවා.
ඉන්දියානු සාගරයේ මුතු ඇටය ලෙස හැඳින්වෙන ශ්රී ලංකාව, නැඟෙනහිර සහ බටහිර යා කරන තීරණාත්මක සමුද්රීය මධ්යස්ථානයක් ලෙස පිහිටා තිබීමේ වැදගත්කම අමාත්යවරයා මෙහිදී විශේෂයෙන්ම අවධාරණය කළා. රුසියාව, චීනය, යුරෝපය සහ අප්රිකාව වැනි සමුද්ර කලාප මෙන්ම සේද මාවත වැනි ඉපැරණි මාර්ග හරහා ලෝකය සම්බන්ධ කිරීමේ හැකියාව ශ්රී ලංකාව සතු බවයි ඔහු පෙන්වා දුන්නේ. සමුද්රීය සහ ගුවන් සේවා මධ්යස්ථානයක් ලෙස ශ්රී ලංකාවේ ඓතිහාසික භූමිකාව ශතවර්ෂ ගණනාවක් පුරා විහිදෙන බවත්, රුසියාව සමඟ විශේෂයෙන් ගුවන් සේවා ක්ෂේත්රයේ සමීප සහයෝගීතාවයක් පවත්වන බවත් ඔහු වැඩිදුරටත් සඳහන් කළා. සෘජු ගුවන් සම්බන්ධතාවල පවතින වර්ධනය උපයෝගී කරගනිමින් රුසියානු ගුවන් ගමන් වාර වසර පුරාම මෙරටට ලැබෙනු ඇතැයි විශ්වාසය පළ කරමින් අමාත්යවරයා සිය අදහස් දැක්වීම අවසන් කර තිබෙනවා.
