දකුණු මුහුදු තීරය කේන්ද්ර කරගනිමින් ක්රියාත්මක වන සියලුම මත්ද්රව්ය ජාවාරම්කරුවන් පිළිබඳව නිශ්චිත තොරතුරු මේ වන විට ආරක්ෂක අංශ සතු බවත්, ඔවුන් මර්දනය කිරීමේ ඒකාබද්ධ මෙහෙයුම් සඳහා ශ්රී ලංකා යුද හමුදාවේ පූර්ණ සහයෝගය ලබා දෙන බවත් යුද හමුදා මාධ්ය ප්රකාශකවරයා ප්රකාශ කළේය. පොලිස් මත්ද්රව්ය නාශක කාර්යාංශය සහ නාවික හමුදාව සමඟ එක්ව ක්රියාත්මක කරන විශේෂ වැටලීම් සඳහා යුද හමුදා බුද්ධි අංශ මගින් ලබාගන්නා තොරතුරු සුවිශේෂී දායකත්වයක් ලබා දෙන බව ඔහු වැඩිදුරටත් අවධාරණය කළේය.
විශේෂයෙන්ම මැදපෙරදිග කලාපයේ පවතින අර්බුදකාරී තත්ත්වය හමුවේ ජාත්යන්තර මුහුදු මාර්ගවල සිදුවන වෙනස්වීම් ප්රයෝජනයට ගනිමින් මත්ද්රව්ය මෙරටට ගෙන ඒමට ජාවාරම්කරුවන් දරන උත්සාහයන් වැළැක්වීමට මෙම ඒකාබද්ධ මෙහෙයුම් මාලාව දියත් කර තිබේ. දකුණු වෙරළ තීරයේ පිහිටි සංචාරක කලාපවල ආරක්ෂාව තහවුරු කිරීමටත්, මත්ද්රව්ය ජාලයන්හි ප්රධාන සැපයුම්කරුවන් අත්අඩංගුවට ගැනීමටත් යුද හමුදා විශේෂ බළකායන්හි සහාය ඇතිව ඉදිරි දිනවලදී වැටලීම් දැඩි කරන බව ද මාධ්ය ප්රකාශකවරයා සඳහන් කළේය. ජාතික ආරක්ෂාවට තර්ජනයක් වන මෙම මත්ද්රව්ය උවදුර මුලිනුපුටා දැමීමට රජය ගෙන යන වැඩපිළිවෙළට ශක්තියක් වෙමින් ගොඩබිම මෙන්ම වෙරළාශ්රිත කලාපවල ද යුද හමුදා බුද්ධි මෙහෙයුම් මේ වන විට ක්රියාත්මක වෙමින් පවතී.
