අවිධිමත් රැකියාවල නිරත වන පුරවැසියන්ට සුවදායී විශ්රාම ජීවිතයක් උරුම කර දීම සඳහා ජීවන චක්රය පදනම් කරගත් සමාජ ආරක්ෂණ ක්රමවේදයක් සකස් කරන බව ග්රාමීය සංවර්ධන, සමාජ ආරක්ෂණ සහ ප්රජා සවිබලගැන්වීම් අමාත්ය ආචාර්ය උපාලි පන්නිලගේ මහතා පවසයි. ඒ මහතා මේ බව ප්රකාශ කළේ සෙත්සිරිපායේදී ඊයේ (මාර්තු 12) පැවැති “සමාජ ආරක්ෂණ හා විශ්රාම වැටුප් තොරතුරු කළමනාකරණ පද්ධතිය” ජනගත කිරීමේ අවස්ථාවට එක්වෙමිනි.
මෙම නව කළමනාකරණ පද්ධතිය ශ්රී ලංකා තැපැල් දෙපාර්තමේන්තුවේ තාක්ෂණ නිලධාරීන් විසින් රජයට අමතර වැයබරක් නොවන පරිදි නිර්මාණය කර තිබීම විශේෂත්වයකි. 2017 වසරේ සිට මෙවැනි පද්ධතියක් සැකසීමට උත්සාහ කළද, ඒ සඳහා විශාල පිරිවැයක් දැරීමට සිදුව තිබූ පසුබිමක මෙම සාර්ථකත්වය හිමිව තිබේ. අමාත්යවරයා පෙන්වා දුන්නේ මෙරට ශ්රම බලකායෙන් 65%ක් නියුතු අවිධිමත් සේවා අංශයේ (මේසන්, වඩු කාර්මික ආදී) පිරිස් වෙනුවෙන් මෙම විශ්රාම වැටුප් ක්රමය ඉතා වැදගත් වන බවයි.
රජයේ ඩිජිටල්කරණ ප්රතිපත්තියට අනුව, තවදුරටත් ලිපිගොනු පසුපස නිලධාරීන් හමුවීමට අවශ්ය නොවන අතර, ජංගම යෙදුමක් (App) හරහා නිවසේ සිටම දායක මුදල් ගෙවීමටත්, විශ්රාම වැටුප් ලබා ගැනීමටත් හැකි වන පරිදි මෙම පද්ධතිය ඉදිරියට ගෙන යන බව අමාත්යවරයා වැඩිදුරටත් සඳහන් කළේය. මෙම අවස්ථාවට සමාජ ආරක්ෂණ මණ්ඩලයේ සභාපති එම්. කේ. බී දිසානායක සහ තැපැල්පති රුවන් සත්කුමාර යන මහත්වරු ඇතුළු පිරිසක් එක්ව සිටියහ.
