ශ්රී ලංකාව මුහුණ දී සිටින බරපතල පාරිසරික අර්බුදයක් වන ප්ලාස්ටික් සහ පොලිතීන් අපද්රව්ය කළමනාකරණය සඳහා “විස්තීරණ නිෂ්පාදක වගකීම්” (Extended Producer Responsibility – EPR) සහ “නැවත එකතු කිරීමේ” (Collect-back) නව උපායමාර්ගික වැඩපිළිවෙළක් හඳුන්වා දී තිබේ. මෙහි සමාරම්භක දැනුවත් කිරීමේ වැඩසටහන රාජ්ය පරිපාලන, පළාත් සභා හා පළාත් පාලන අමාත්ය මහාචාර්ය චන්දන අබයරත්න මහතාගේ ප්රධානත්වයෙන් පසුගියදා (11) කොළඹදී පැවැත්විණි.
රජයේ සංඛ්යාලේඛනවලට අනුව ශ්රී ලංකාව තුළ වාර්ෂිකව ප්ලාස්ටික් අපද්රව්ය මෙට්රික් ටොන් මිලියන 1.6කට වඩා ජනනය වන අතර, දෛනිකව පරිසරයට එකතු වන අපද්රව්ය ප්රමාණය මෙට්රික් ටොන් 938කි. මෙයින් එකතු කරගනු ලබන්නේ 32%ක් පමණක් වන අතර, ප්රතිචක්රීකරණය වන්නේ 4%ක් වැනි ඉතා සුළු ප්රමාණයකි. මෙම තත්ත්වය හේතුවෙන් ශ්රී ලංකාව සාගර ප්ලාස්ටික් දූෂණයට වැඩිම දායකත්වයක් සපයන රටවල් අතරට පත්ව තිබීම කණගාටුදායක බව අමාත්යවරයා මෙහිදී පෙන්වා දුන්නේය.
මෙම නව EPR ක්රමවේදය යටතේ ප්ලාස්ටික් නිෂ්පාදන වෙළෙඳපොළට නිකුත් කරන නිෂ්පාදකයින්ට එම අපද්රව්ය යළි එකතු කරගැනීමේ වගකීම පැවරේ. බස්නාහිර පළාතේ පළාත් පාලන ආයතන කේන්ද්ර කරගනිමින් නියමු ව්යාපෘතියක් ලෙස ඇරඹෙන මෙය ඉදිරියේදී දිවයින පුරා ව්යාප්ත කිරීමට නියමිතය. රජයේ “පොහොසත් රටක් – ලස්සන ජීවිතයක්” ප්රතිපත්තිය සාක්ෂාත් කර ගැනීමට නම් හුදු සටන් පාඨවලින් ඔබ්බට ගිය සැබෑ “සිස්ටම් චේන්ජ්” (System Change) එකක් පරිසර සංරක්ෂණය තුළ සිදුවිය යුතු බව අමාත්යවරයා වැඩිදුරටත් අවධාරණය කළේය.
