ශ්රී ලංකාවේ අපනයන ආර්ථිකයේ ඉදිරි දැක්ම තීරණය කෙරෙන “National Export Roadmap: The CEO Forum” උපායමාර්ගික සංසදය පෙරේදා (04) අපනයන සංවර්ධන මණ්ඩලයේදී (EDB) පැවැත්විණි. මෙහිදී ජාතික අපනයන මාර්ග සිතියම පෞද්ගලික අංශය වෙත ඉදිරිපත් කළ අතර, 2025 වසරේ ප්රගතිය සමාලෝචනය කරමින් 2026 වසර සඳහා වන උපායමාර්ගික ඉලක්ක පිළිබඳව පොදු එකඟතාවකට එළඹුණි.
සංසදය අමතමින් කර්මාන්ත හා ව්යවසායකත්ව සංවර්ධන ඇමැති සුනිල් හඳුන්නෙත්ති මහතා අවධාරණය කළේ දේශීය කර්මාන්ත සවිබල ගැන්වීම සඳහා රජය ප්රධාන ආයෝජකයා ලෙස කටයුතු කරන බවයි. කාර්මික කලාප නවීකරණය, බලශක්ති සැපයුම විධිමත් කිරීම සහ තාක්ෂණික පහසුකම් සැපයීම හරහා ව්යවසායකයන්ට හිතකර ව්යාපාරික වටපිටාවක් නිර්මාණය කිරීම රජයේ ප්රමුඛතම කාර්යය බව ඔහු පෙන්වා දුන්නේය. රාජ්ය සහ පෞද්ගලික අංශයේ සාමූහික දායකත්වයෙන් පමණක් රටේ ආර්ථිකය ශක්තිමත් කළ හැකි බව ඇමැතිවරයා මෙහිදී වැඩිදුරටත් අවධාරණය කළේය.
