මාවනැල්ල ප්රදේශයේ සිදුකළ විමර්ශනයකින් අනාවරණය වූ තොරතුරු මත මාතලේ ප්රදේශයේ පවත්වාගෙන ගිය අනවසර ආයුර්වේද ආලේපන නිෂ්පාදනාගාරයක් වටලෑමට පාරිභෝගික කටයුතු පිළිබඳ අධිකාරිය (CAA) පියවර ගෙන තිබේ. අප්රේල් 07 වනදා සිදුකළ මෙම වැටලීමේදී අනාවරණය වී ඇත්තේ අදාළ ආලේපන නිෂ්පාදනය කිරීම සඳහා මෙම ආයතනයට කිසිදු බලපත්රයක් හෝ අනුමැතියක් නොමැති බවයි.
මෙම ආයතනය විසින් සිදුකර ඇත්තේ වෙනත් නිෂ්පාදකයන්ගෙන් තොග වශයෙන් මිලදී ගන්නා ආයුර්වේද ආලේපන, සිය ආයතනයේ සන්නාමයන් (Branding) යටතේ නැවත ඇසුරුම් කර සංචාරක කලාප වෙත බෙදාහැරීම බව විමර්ශනවලදී හෙළි වී තිබේ. මෙලෙස බෙදා හරිනු ලබන ආලේපන, සංචාරක කලාපවල පිහිටි ව්යාපාරික ස්ථාන මගින් විදේශීය සංචාරකයින් වෙත අතිශය අධික මිල ගණන් යටතේ අලෙවි කර ඇති බව ද නිලධාරීන් නිරීක්ෂණය කර ඇත.
අදාළ නිෂ්පාදනවල සාම්පල වැඩිදුර පරීක්ෂණ සඳහා යොමු කර ඇති අතර සිද්ධිය සම්බන්ධයෙන් පාරිභෝගික කටයුතු පිළිබඳ අධිකාරිය වැඩිදුර විමර්ශන පවත්වයි. විශේෂයෙන්ම සංචාරක ප්රදේශවලින් මෙවැනි ආයුර්වේද නිෂ්පාදන මිලදී ගැනීමේදී ඒවායේ ගුණාත්මකභාවය, නිල අනුමැතිය සහ මිල ගණන් පිළිබඳව දැඩි ලෙස සැලකිලිමත් වන ලෙස එම අධිකාරිය මහජනතාවගෙන් සහ සංචාරකයින්ගෙන් ඉල්ලා සිටියි.
