ශ්රී ලංකාව සතු සියලු ඉඩම් විධිමත් ලෙස සිතියම්ගත කර මධ්යගත දත්ත පද්ධතියකට ඇතුළත් කිරීමේ විශේෂ වැඩපිළිවෙළක් කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතාගේ ප්රධානත්වයෙන් ඊයේ (04) මිනින්දෝරු දෙපාර්තමේන්තුවේදී ආරම්භ විය. මෙරට පවතින ඉඩම් කැබලි මිලියන 16කට අධික ප්රමාණය නිසි ලෙස කළමනාකරණය කිරීම, ඉඩම් ආරවුල් විසඳීම සහ ආයෝජන අවස්ථාවන් සඳහා නිවැරදි තොරතුරු ලබාදීම මෙම ව්යාපෘතියේ මූලික අරමුණයි. මිනින්දෝරු දෙපාර්තමේන්තුවේ නවීන තාක්ෂණය භාවිත කරමින් ක්රියාත්මක වන මෙම වැඩපිළිවෙළේ මූලික අදියර මොණරාගල දිස්ත්රික්කයෙන් ආරම්භ කර ඇති අතර එය මේ වන විට සාර්ථකව ක්රියාත්මක වෙමින් පවතී.
සාකච්ඡාවට එක්වූ අමාත්ය ලාල්කාන්ත මහතා අවධාරණය කළේ, ඉඩම් පිළිබඳ නිසි දත්ත පද්ධතියක් නොමැති වීම නිසා මෙතෙක් කලක් මහා පරිමාණ ඉඩම් කොල්ලකෑම් සඳහා මග පෑදී තිබූ බවයි. දේශීය හා විදේශීය ආයෝජකයන් ඉඩම් ඉල්ලීමේදී පවා පවතින ඉඩම් පිළිබඳ නිසි චිත්රයක් රජය සතු නොවීම රටේ ආර්ථික සංවර්ධනයට බාධාවක්ව පැවති බවත්, මෙම ව්යාපෘතිය හරහා එම හිඩැස පිරවීමට හැකි බවත් අමාත්යවරයා පෙන්වා දුන්නේය. රාජ්ය නිලධාරීන්ගේ දක්ෂතාව සහ කැපවීම අගය කළ අමාත්යවරයා, සතුටින් හා අරමුණක් සහිතව රට වෙනුවෙන් වැඩ කරන රාජ්ය සේවයක් බිහි කිරීම වත්මන් රජයේ අරමුණ බවද පැවසීය.
වත්මන් ගෝලීය තත්ත්වය පිළිබඳව ද අදහස් දැක්වූ අමාත්යවරයා, ඉරාන-ඊශ්රායල යුද්ධය වැනි දරුණු අර්බුද පවා අවසානයේ ලෝකයට නව ධනාත්මක වෙනස්කම් සහ උත්තර රැගෙන එන බව ප්රකාශ කළේය. එවැනි අභියෝගාත්මක කාලයක රටක් ලෙස නැගී සිටීමට නම් රාජ්ය නිලධාරීන් සහ දේශපාලන නායකත්වය එකාමෙන් කැපවිය යුතු බව ඔහු පැවසීය. මෙම අවස්ථාවට ඉඩම් සහ වාරිමාර්ග නියෝජ්ය අමාත්ය අරවින්ද සෙනරත් විතාරණ මහතා, අමාත්යාංශ ලේකම්වරයා සහ මිනින්දෝරු දෙපාර්තමේන්තුවේ උසස් නිලධාරීහු පිරිසක් සහභාගී වූහ.
