ඇමරිකාව, කැනඩාව සහ මෙක්සිකෝව සත්කාරකත්වය දරන 2026 FIFA ලෝක කුසලාන පාපන්දු තරඟාවලියට සුදානම් වීම සඳහා ඉරාන ජාතික පාපන්දු කණ්ඩායම (Team Melli) තුර්කියේ ඇන්ටාලියා (Antalya) නුවරදී සිය පුහුණුවීම් අද (2026 මාර්තු 26) ආරම්භ කළේය. ඉරානය සහ ඇමරිකා-ඊශ්රායල හවුල්කාරීත්වය අතර පවතින යුදමය වාතාවරණය හමුවේ මෙම පුහුණු කඳවුර දැඩි මාධ්ය පාලනයක් යටතේ පවත්වනු ලබයි.
ලෝක කුසලානයට පෙර සූදානමක් ලෙස ඉරානය එළඹෙන සිකුරාදා නයිජීරියාව සමඟත්, ලබන අඟහරුවාදා කොස්ටාරිකාව සමඟත් තුර්කියේදී සුහද තරඟ දෙකකට සහභාගී වීමට නියමිතය. මෙම තරඟ මුලින් ජෝර්දානයේ පැවැත්වීමට සැලසුම් කර තිබුණද, පවතින යුද ගැටුම් හේතුවෙන් එය තුර්කිය වෙත ගෙන ඒමට පියවර ගැනුණි. ආරක්ෂක හේතූන් මත ඉරානය සහභාගී වන ලෝක කුසලාන තරඟ ඇමරිකාවෙන් බැහැරව මෙක්සිකෝවේ පැවැත්වීමට ඇති හැකියාව පිළිබඳව ඉරාන පාපන්දු සම්මේලනය මේ වන විට FIFA ආයතනය සමඟ සාකච්ඡා කරමින් සිටියි.
මෙම පුහුණු සංචිතය පිළිබඳව කතාබහක් ඇතිවීමට තවත් හේතුවක් වූයේ සුපිරි ක්රීඩක සර්දාර් අස්මුන් (Sardar Azmoun) කණ්ඩායමෙන් ඉවත් කර තිබීමයි. ඩුබායි පාලකයා හමුවීම නිසා රජයට පක්ෂපාතී නොවන බවට එල්ල වූ චෝදනා මත ඔහුව සංචිතයෙන් නෙරපා ඇති බව වාර්තා වේ. කෙසේ වෙතත්, මෙහ්දි තාරෙමි (Mehdi Taremi) ඇතුළු සෙසු ක්රීඩකයින් දැඩි උනන්දුවකින් පුහුණුවීම්වල නිරත වන බව විදෙස් මාධ්ය වාර්තා කරයි.
