ශ්රී ලංකාව සහ නෝර්වේ රාජ්යය අතර පවතින ද්විපාර්ශ්වික සබඳතා තවදුරටත් වර්ධනය කරමින්, දෙරට අතර පාරිසරික ප්රමුඛතා සහ තිරසාර සංවර්ධන මුලපිරීම් පිළිබඳ විශේෂ සාකච්ඡාවක් පරිසර අමාත්යංශයේදී පවත්වා තිබේ. ශ්රී ලංකාවේ නෝර්වේ කොන්සල් ස්ටර්ල් හැරල්ඩ් පෙඩර්සන් (Sturle Harald Pedersen) මහතා සහ පරිසර අමාත්ය වෛද්ය දම්මික පටබැඳි මහතා අතර ඊයේ (19) පැවති මෙම හමුවේදී හරිත ආර්ථික ප්රවේශයන් පිළිබඳව දීර්ඝ ලෙස කරුණු හුවමාරු කරගෙන ඇත. මෙහිදී විශේෂයෙන්ම පුනර්ජනනීය බලශක්තිය, හරිත හයිඩ්රජන් වැඩසටහන් සහ චක්රීය ආර්ථික ක්රමවේදයන් වැනි ක්ෂේත්ර කෙරෙහි දෙපාර්ශ්වයේම අවධානය යොමු වූ බව වාර්තා වේ.
පරිසර අමාත්යංශයේ ලේකම් කේ.ආර්. උඩුවාවල මහතා ඇතුළු ජ්යෙෂ්ඨ නිලධාරීන්ගේ සහභාගීත්වයෙන් පැවති මෙම සාකච්ඡාවේදී, ශ්රී ලංකාවේ දැනට ක්රියාත්මක සහ යෝජිත විශේෂ පාරිසරික ව්යාපෘතීන් පිළිබඳව කොන්සල්වරයා දැනුවත් කර තිබේ. ජෛව ස්කන්ධ අගය කිරීම (Biomass Valorization) සහ තිරසාර රාමු සම්බන්ධ මුලපිරීම් පිළිබඳව මෙහිදී විශේෂ අවධානයක් යොමු වූ අතර, කාබන් උදාසීනත්වය සාක්ෂාත් කර ගැනීමේ දිගුකාලීන ජාතික ඉලක්කයන් සපුරා ගැනීම සඳහා නෝර්වේ රාජ්යයේ සහයෝගය අපේක්ෂා කරන බව අමාත්යවරයා මෙහිදී සඳහන් කර ඇත. ජාතික වශයෙන් තීරණය කරන ලද දායකත්වයන් (NDC 3.0) යටතේ ශ්රී ලංකාව ලබා දී ඇති දේශගුණික කැපවීම් ඉටු කර ගැනීමට මෙය මහඟු පිටුවහලක් වනු ඇත.
මීට අමතරව, ඝන අපද්රව්ය කළමනාකරණය හරහා බලශක්ති විසඳුම් සෙවීම වැනි නව්ය ක්ෂේත්රයන්හි සහයෝගීතාව සඳහා ඇති හැකියාවන් පිළිබඳව ද දෙපාර්ශ්වයම කරුණු හුවමාරු කර ගත්හ. ශ්රී ලංකාවේ දේශගුණික අරමුණු සාර්ථක කර ගැනීමට සහ ජාතික ප්රතිපත්ති රාමුව තුළ පාරිසරික වශයෙන් අන්යෝන්ය සහයෝගීතාව වර්ධනය කර ගැනීමට ඇති කැපවීම මෙම සාකච්ඡාවේදී නැවත වරක් තහවුරු විය. මෙම සහයෝගීතාව හරහා ශ්රී ලංකාවට හරිත නවෝත්පාදන හඳුන්වා දීමටත්, පරිසර හිතකාමී සංවර්ධන ඉලක්ක සපුරා ගැනීමටත් හැකි වනු ඇතැයි අපේක්ෂා කෙරේ.
