ජාත්යන්තර කාන්තා දිනය වෙනුවෙන් විශේෂ සුබපැතුම් පණිවිඩයක් නිකුත් කරමින් විපක්ෂ නායක සජිත් ප්රේමදාස මහතා සඳහන් කර ඇත්තේ, වර්තමාන සමාජය තුළ කාන්තාවට යුක්තිය සහ සාධාරණත්වය ඉටු වන්නේද යන්න ගැටලු සහගත බවයි. මෙවර ජාත්යන්තර කාන්තා දින තේමාව වන “සියලු කාන්තාවන් සඳහා අයිතිවාසිකම්, යුක්තිය සහ ක්රියාමාර්ග සැලසීම” යන්න පෙරදැරිව ඇයට හිමි ගරුත්වය ලබාදීමට සියලු දෙනා අදිටන් කරගත යුතු බව ඔහු පවසයි.
විපක්ෂ නායකවරයාගේ පණිවිඩයේ ඇතුළත් ප්රධාන කරුණු කිහිපයක් මෙසේය. ලංකාවේ ජනගහනයෙන් 52%ක් වන කාන්තාව පවුලේ ආර්ථිකයට සහ ගෘහණියක ලෙස විශාල මෙහෙවරක් කළද, ඇය තවමත් ගෘහස්ථ ප්රචණ්ඩත්වය, රැකියා ස්ථානයේ හිංසනයන් සහ වැටුප් විෂමතාවලට ගොදුරු වන බව ඔහු පෙන්වා දෙයි. විශේෂයෙන්ම කාන්තාවන්ගේ ආරක්ෂාව තහවුරු කිරීම සඳහා අවශ්ය නීති සහ ප්රතිපත්ති සම්පාදනය කිරීම පාර්ලිමේන්තුවේ මූලික වගකීමක් බව ඔහු අවධාරණය කරයි.
ඕනෑම රටක ශිෂ්ටාචාරය මැනිය හැක්කේ එම රට කාන්තාවන්ට දක්වන සැලකිල්ල මත බව පෙන්වා දෙන සජිත් ප්රේමදාස මහතා, ඇයව නවමු ඇසකින් දෙස බලා සමාජය තුළ පුළුල් වෙනසක් ඇති කළ යුතු බව පවසයි. ශිෂ්ටාචාරයේ නිර්මාපිකාව වන කාන්තාවට නිසි ගරුත්වය ලබාදිය හැකි පසුබිමක් නිර්මාණය කිරීම මෙවර කාන්තා දිනයේදී ඇයට කළ හැකි සැබෑ උපහාරය බව විපක්ෂ නායකවරයා සිය පණිවිඩයෙන් වැඩිදුරටත් සඳහන් කරයි.
