විවිධ අවශ්යතා සඳහා පොලිස් නිෂ්කාශන වාර්තා (Police Clearance Certificates) ලබාගන්නා දේශීය හා විදේශීය පුරවැසියන් වෙනුවෙන් ශ්රී ලංකා පොලිසිය විසින් විශේෂ මාර්ගෝපදේශ මාලාවක් නිකුත් කර තිබේ. අයදුම්කරු අපරාධ හෝ අනීතික ක්රියාවලට සම්බන්ධ නොවූ නීතිගරුක පුද්ගලයකු නම් ඉතා කෙටි කලකින් වාර්තාව ලබාගත හැකි බව පොලිසිය අවධාරණය කරයි.
පොලිස් නිෂ්කාශන වාර්තා ලබාගැනීමේ ප්රධාන ක්රමවේද මෙසේය. විදේශගතව සිටින පුරවැසියන්ට www.police.lk වෙබ් අඩවියේ ‘E-service’ යොමුව හරහා හෝ අදාළ රටේ පිහිටි ශ්රී ලංකා තානාපති කාර්යාලය හරහා අයදුම් කළ හැකිය. මේ සඳහා රුපියල් 5,100ක ගාස්තුවක් අය කෙරෙන අතර, මුදල් ගෙවා දින 14ක් ඇතුළත වාර්තාව ලබාගත හැකිය. දේශීය පුරවැසියන්ට තම පදිංචි වසමේ පොලිස් ස්ථානාධිපතිවරයා වෙත ග්රාම නිලධාරී සහතිකය සහ හැඳුනුම්පත ඉදිරිපත් කර අයදුම් කළ හැකි අතර, පැය 48ක් ඇතුළත අදාළ වාර්තාව නිකුත් කිරීමට පොලිසිය කටයුතු කරයි.
අයදුම් කිරීමේදී සැලකිය යුතු වැදගත් කරුණු කිහිපයක් පොලිසිය පෙන්වා දෙයි. අයදුම්පතේ පොලිස් වසම, දුරකථන අංකය සහ විද්යුත් තැපෑල නිවැරදිව සඳහන් කිරීම අනිවාර්ය වේ. කිසියම් නඩු කටයුත්තක් පවතී නම්, විදේශයකින් පිටුවහල් කර ඇත්නම් හෝ ඔබ ත්රිවිධ හමුදා/පොලිස් නිලධාරියෙකු නම් ඒ බව අනිවාර්යයෙන්ම සඳහන් කළ යුතුය. වැරදි තොරතුරු ඇතුළත් කළහොත් වාර්තාව ලබාගැනීමට ගතවන කාලය දීර්ඝ විය හැකි බවත්, යම් සංශෝධනයක් අවශ්ය නම් අයදුම් කර පැය 72ක් ඇතුළත පොලිස් නිෂ්කාශන අංශය අමතා එය සිදු කරගත හැකි බවත් නිවේදනයේ සඳහන් වේ.
