ගෝලීය වශයෙන් උද්ගත වී ඇති අර්බුදකාරී වාතාවරණය හමුවේ ශ්රී ලංකාවේ පිහිටි තානාපති කාර්යාල, මහ කොමසාරිස් කාර්යාල සහ මෙරට රැඳී සිටින විදෙස් ජාතිකයින්ගේ ආරක්ෂාව තහවුරු කිරීම සඳහා විශේෂ ආරක්ෂක වැඩපිළිවෙළක් වහාම ක්රියාත්මක කිරීමට පොලිසිය පියවර ගෙන තිබේ. පොලිස් මාධ්ය කොට්ඨාසය අද (මාර්තු 03) පස්වරුවේ සඳහන් කළේ පොලිස්පතිවරයා විසින් සියලුම පොලිස් ස්ථාන වෙත මේ සම්බන්ධයෙන් දැඩි උපදෙස් නිකුත් කර ඇති බවයි.
මැදපෙරදිග කලාපයේ පවතින යුදමය තත්ත්වය සැලකිල්ලට ගනිමින් මෙරට සාමය පවත්වාගෙන යාමට බාධා විය හැකි ඕනෑම සිදුවීමක් වැළැක්වීම රජයේ අරමුණයි. ඒ අනුව තානාපති කාර්යාල, මහ කොමසාරිස් කාර්යාල, ඒවායේ නිල නිවාස සහ විදේශිකයන් බහුලව ගැවසෙන සංචාරක ගමනාන්ත, වාසස්ථාන, ව්යාපාරික ස්ථාන මෙන්ම ආගමික මධ්යස්ථාන සඳහා ද පැය 24 පුරා ක්රියාත්මක වන පරිදි ආරක්ෂාව තර කර ඇත. මෙම ආරක්ෂක වැඩපිළිවෙළ නැවත දැනුම් දෙනතුරු අඛණ්ඩව ක්රියාත්මක වන අතර, අවශ්යතාව මත මේ සඳහා ත්රිවිධ හමුදා සහාය ලබා ගැනීමට ද පොලිසියට අවසර ලබා දී තිබේ.
විශේෂයෙන්ම ඇමෙරිකාව, ඊශ්රායලය සහ ඉරානය අතර පවතින ගැටුම්කාරී තත්ත්වය හේතුවෙන් මෙරට සිටින එම රටවල නියෝජිතයන්ගේ සහ සංචාරකයන්ගේ ආරක්ෂාව කෙරෙහි රජය දැඩි අවධානයක් යොමු කර ඇත.
