ශ්රී ලංකාවේ ප්රමුඛතම ජාත්යන්තර වෙළඳ ප්රදර්ශනය වන “ශ්රී ලංකා එක්ස්පෝ 2026″ (Sri Lanka Expo 2026) සඳහා සූදානම් වෙමින්, මෙරට ගෝලීය වෙළඳ හවුල්කාරිත්වයන් තවදුරටත් පුළුල් කිරීමට රජය පියවර ගෙන තිබේ. 2026 ජූනි 18 සිට 21 දක්වා කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී (BMICH) පැවැත්වීමට නියමිත මෙම දැවැන්ත ප්රදර්ශනය, ශ්රී ලංකාව වෙළඳාම, ආයෝජන සහ නවෝත්පාදන සඳහා වන තරඟකාරී මධ්යස්ථානයක් ලෙස ලෝකය හමුවේ තැබීම අරමුණු කරයි.
කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති මහතාගේ ප්රධානත්වයෙන් යුත් ඉහළ පෙළේ දූත පිරිසක්, මෙරට සිටින විදේශීය රාජ්යතාන්ත්රික දූත මණ්ඩල සමඟ මෑතකදී සාකච්ඡා මාලාවකට එක්විය. මෙම සාකච්ඡා සඳහා අමාත්යාංශ ලේකම් තිලකා ජයසුන්දර මහත්මිය සහ අපනයන සංවර්ධන මණ්ඩලයේ (EDB) සභාපති මංගල විජේසිංහ මහතා ද සහභාගී වූහ. ඔවුන් බ්රිතාන්ය මහ කොමසාරිස් ඇන්ඩෲ පැට්රික්, ඉන්දුනීසියානු තානාපතිනි දේවි ගුස්ටිනා ටොබින් සහ දකුණු කොරියානු තානාපතිනි මියොන් ලී යන මහත්ම මහත්මීන් හමුවී ද්විපාර්ශ්වික වෙළඳ සබඳතා ශක්තිමත් කර ගැනීම සහ එම රටවල ගැනුම්කරුවන් හා ආයෝජකයින් එක්ස්පෝ ප්රදර්ශනයට සම්බන්ධ කර ගැනීම පිළිබඳව දීර්ඝ ලෙස සාකච්ඡා කළහ.
මෙම වැඩපිළිවෙළ හරහා ඇඟලුම්, තේ, කුළුබඩු, රබර් නිෂ්පාදන, තොරතුරු තාක්ෂණ සේවා සහ කාර්මික නිෂ්පාදන යන ක්ෂේත්රවල ශ්රී ලාංකික අපනයනකරුවන්ට ජාත්යන්තර වෙළඳපොළ සමඟ සෘජුව සම්බන්ධ වීමට අවස්ථාව සැලසේ. ශ්රී ලංකා අපනයන සංවර්ධන මණ්ඩලය විසින් සංවිධානය කරනු ලබන මෙම ප්රදර්ශනය, විදේශීය ආයෝජකයින්ට මෙරට ව්යාපාරික ආයතන සමඟ උපායමාර්ගික සහයෝගීතාවන් ඇති කර ගැනීමට ද කදිම වේදිකාවක් වනු ඇත.
