මැදපෙරදිග කලාපයේ වේගයෙන් උච්චාවචනය වන ආරක්ෂක තත්ත්වය සහ එහි ගෝලීය බලපෑම පිළිබඳව සාකච්ඡා කිරීම සඳහා ජනාධිපති අනුර කුමාර දිසානායක මහතා සහ කටාර් රාජ්යයේ එමීර් ෂෙයික් තමීම් බින් හමාඩ් අල් තානි (Sheikh Tamim bin Hamad Al Thani) මහතා අතර විශේෂ දුරකථන සංවාදයක් පවත්වා තිබේ. මෙහිදී ජනාධිපතිවරයා ප්රධාන වශයෙන්ම අවධානය යොමු කළේ කටාර් රාජ්යයේ සේවය කරන 150,000කට අධික ශ්රී ලාංකිකයන්ගේ ආරක්ෂාව සහ සුබසාධනය පිළිබඳවයි. පවතින කලාපීය නොසන්සුන්තා මධ්යයේ ශ්රී ලාංකිකයන් ඇතුළු සියලුම පදිංචිකරුවන්ගේ ආරක්ෂාව සහතික කරන බවට කටාර් එමීර්වරයා මෙහිදී සහතික විය.
හෝමුස් සමුද්ර සන්ධිය වැනි ප්රධාන මුහුදු මාර්ගවලට එල්ල වී ඇති තර්ජන හේතුවෙන් ගෝලීය සැපයුම් දාමයන්ට සහ බලශක්ති වෙළඳපොළට එල්ල විය හැකි බාධාවන් පිළිබඳව ද නායකයන් දෙපළ දීර්ඝ වශයෙන් කරුණු හුවමාරු කරගත්හ. ඉහළ යන බලශක්ති පිරිවැය ශ්රී ලංකාව වැනි සංවර්ධනය වෙමින් පවතින රටවල ආර්ථිකයට එල්ල කරන බලපෑම අවම කිරීම සඳහා ජාත්යන්තර මට්ටමේ සම්බන්ධීකරණයක් අත්යවශ්ය බව ජනාධිපති දිසානායක මහතා මෙහිදී අවධාරණය කළේය. ඕනෑම අභියෝගයක් හමුවේ බලශක්ති සැපයුම අඛණ්ඩව පවත්වාගෙන යාමට කටාර් රාජ්යය කැපවී සිටින බව එමීර්වරයා යළිත් තහවුරු කළේය.
කලාපීය සහ ගෝලීය ස්ථාවරත්වය වෙනුවෙන් යුදමය ක්රියාමාර්ග වහා නතර කර රාජ්ය තාන්ත්රික විසඳුම් කරා යොමු විය යුතු බවට නායකයන් දෙපළම එකඟතාව පළ කළහ. ස්ථාවරත්වය උදෙසා පවතින එකම මාවත සාමකාමී මැදිහත්වීම පමණක් බව ශ්රී ලංකාවේ ස්ථාවරය බව ජනාධිපතිවරයා මෙහිදී යළිත් ප්රකාශ කළේය. මෙම සාකච්ඡාව හරහා මැදපෙරදිග වෙසෙන ශ්රී ලාංකිකයන්ගේ ආරක්ෂාව පිළිබඳව පවතින අවිනිශ්චිතතාවය දුරු කිරීමටත්, දෙරට අතර සබඳතා තවදුරටත් ශක්තිමත් කිරීමටත් හැකි වී තිබේ.
