වැඩකරන ජනතාව මුහුණ දෙන ප්රචණ්ඩත්වය සහ හිරිහැර කිරීම්, විශේෂයෙන්ම ස්ත්රී පුරුෂ සමාජභාවය මත පදනම් වූ හිංසනයන් වැළැක්වීම සඳහා වන ජාත්යන්තර කම්කරු සංවිධානයේ (ILO) අංක 190 දරන සම්මුතිය (C190) ශ්රී ලංකාව විසින් නිල වශයෙන් අපරානුමත කර (Ratify) තිබෙනවා. ඒ අනුව බංග්ලාදේශයට පසුව මෙම වැදගත් කම්කරු ප්රමිතිය පිළිගත් දකුණු ආසියාවේ දෙවන රට බවට ශ්රී ලංකාව පත්ව ඇත. මෙම අපරානුමත කිරීමත් සමඟ රජය විසින් සියලුම සේවා ස්ථානවල ප්රචණ්ඩත්වය සහ හිරිහැර වැළැක්වීම සහ ඒවාට විසඳුම් සෙවීම සඳහා අවශ්ය ජාතික නීති සහ ප්රතිපත්තිමය පියවරයන් ක්රියාවට නැංවිය යුතුවේ.මෙම සන්ධිස්ථානය පිළිබඳව පැහැදිලි කිරීමක් සහ ඉදිරි පියවර සාකච්ඡා කිරීම සඳහා කාන්තා කර්මාන්ත හා වාණිජ මණ්ඩලය (WCIC) විසින් විශේෂ වැඩමුළුවක් කොළඹදී පවත්වනු ලැබුවා. ලිඛිත, වාචික, කායික, ලිංගික හෝ මනෝවිද්යාත්මක වේවා, ඕනෑම ආකාරයක ප්රචණ්ඩත්වයකින් තොරව ගෞරවනීය ලෙස සේවය කිරීමට සෑම සේවකයෙකුටම අයිතියක් ඇති බව එහිදී අවධාරණය කෙරුණා. එමෙන්ම මෙම සම්මුතිය රාජ්ය, පෞද්ගලික, විධිමත් මෙන්ම අවිධිමත් (Formal & Informal) යන සියලුම අංශවල සේවකයන්ට එකලෙස අදාළ වන බවද පෙන්වා දෙනු ලැබුවා.කෙසේ වෙතත් සම්මුතිය අපරානුමත කිරීමෙන් පමණක් සේවකයන්ට පූර්ණ රැකවරණය නොලැබෙන අතර, ඊට අනුකූල වන පරිදි මෙරට පාර්ලිමේන්තුව මඟින් ‘වැඩබිම් හිංසන විරෝධී’ නව දේශීය පනතක් කඩිනමින් සම්මත කළ යුතුව පවතිනවා. මෙම වැඩමුළුවේදී අදහස් දැක්වූ ශ්රී ලංකාව සහ මාලදිවයින සඳහා වන ILO අධ්යක්ෂ ජෝනි සිම්ප්සන් (Joni Simpson) මහත්මිය සඳහන් කළේ සේවා ස්ථානයන්හි පවතින අනාරක්ෂිත බව නිසා දක්ෂතාවලින් රටට වැඩක් නොගෙන අපතේ යන බවත්, නිහඬව සිටීමේ සහ ඉවසීමේ සංස්කෘතිය දැන්වත් අවසන් විය යුතු බවත්ය.
