ශ්රී ලංකාව සහ රුසියාව අතර ප්රවාහන ක්ෂේත්රයේ මානව සම්පත් සංවර්ධනය හා පුහුණු කිරීම් සම්බන්ධයෙන් විශේෂ අවබෝධතා ගිවිසුමක් ශාන්ත පීටර්ස්බර්ග්හිදී අත්සන් තබා තිබේ. රුසියානු ප්රවාහන අමාත්ය අන්ද්රේ නිකිටින් සහ ශ්රී ලංකාවේ ප්රවාහන, මහාමාර්ග හා නාගරික සංවර්ධන අමාත්ය බිමල් රත්නායක යන මහත්වරුන් අතර පැවැති ද්වීපාර්ශ්වික සාකච්ඡාවලින් අනතුරුව මෙම එකඟතාවන්ට එළැඹිණි. මෙමගින් බහුවිධ ප්රවාහන මාධ්යස්ථාන, මාර්ග ආරක්ෂාව, ඩිජිටල්කරණය සහ ප්රවාහන ආර්ථිකය වැනි ක්ෂේත්ර රැසක දැනුම හුවමාරු කර ගැනීමට අපේක්ෂිතය.
මෙහිදී විශේෂ අවධානයක් යොමු වූයේ මෙරට දුම්රිය පද්ධතිය නවීකරණය කිරීම කෙරෙහිය. විශේෂයෙන් කිලෝමීටර් 60ක් දිගැති කොළඹ – අවිස්සාවේල්ල කැලණිවැලි දුම්රිය මාර්ගය ප්රතිසංස්කරණය සඳහා රුසියානු සමාගම්වල දායකත්වය ලබා ගැනීම පිළිබඳව සාකච්ඡා වී තිබේ. මීට අමතරව ප්රවාහන ක්ෂේත්රයේ වෘත්තීය පුහුණුව ඉහළ නැංවීම සඳහා රුසියානු ප්රවාහන විශ්වවිද්යාලයේ (MIIT) ශාඛාවක් කොළඹ නගරයේ ස්ථාපිත කිරීමට ද රුසියානු පාර්ශ්වය යෝජනා කර ඇත.
දෙරට අතර ගුවන් මගී ප්රවාහනයේ වර්ධනය ද මෙහිදී ඇගයීමට ලක් විය. දත්ත වාර්තාවලට අනුව 2025 වසරේදී මගීන් 219,000කට අධික පිරිසක් දෙරට අතර ගමන් කර ඇති අතර, 2026 වසරේ ජනවාරි මාසය තුළ පමණක් මගීන් 31,000කට ආසන්න සංඛ්යාවක් වාර්තා වී තිබේ. මෙම සහයෝගීතාව හරහා ඉදිරියේදී ගුවන් මගී ප්රවාහනය තවදුරටත් පුළුල් කිරීමට දෙපාර්ශ්වයම එකඟතාව පළ කර ඇත.
