ශ්රී ලංකාවේ ජල මූලාශ්ර සංරක්ෂණය සහ ඒවායේ තිරසාර භාවිතය තහවුරු කිරීමේ අරමුණින් සකස් කළ “තිරසර දියවර” ජාතික වැඩසටහන, ලෝක ජල දිනයට සමගාමීව අද (2026 මාර්තු 24) පරිසර අමාත්ය වෛද්ය දම්මික පටබැඳි මහතාගේ ප්රධානත්වයෙන් එළිදක්වන ලදී. මෙරට භූගත සහ මතුපිට ජල සම්පත් කළමනාකරණය සඳහා විධිමත් ජාතික වැඩපිළිවෙලක අවශ්යතාව හඳුනාගනිමින් රජය මෙම පියවර ගෙන තිබේ.
මෙම වැඩසටහන යටතේ දිවයින පුරා පවතින ස්වාභාවික ජල උල්පත්, බුබුළු සහ භූගත ජල ධරයන් හඳුනාගෙන ඒවායේ ගුණාත්මකභාවය අනුව ජාතික සහ ප්රාදේශීය මට්ටමින් සිතියම්ගත කිරීම ප්රධාන වශයෙන් සිදු කෙරේ. එමෙන්ම වර්තමානයට ගැලපෙන පරිදි ජල සම්පත් මණ්ඩල පනත සංශෝධනය කිරීම, භූගත ජලයේ ප්රමාණාත්මක සහ ගුණාත්මක විචලනයන් අධ්යයනය කර දත්ත පද්ධති යාවත්කාලීන කිරීම මෙන්ම ජල සංරක්ෂණය පිළිබඳව මහජනතාව දැනුවත් කරමින් ජලයේ ගුණාත්මකභාවය පරීක්ෂා කිරීම සඳහා ප්රජා පහසුකම් සැලසීම ද මෙහි සෙසු අංගයන් වේ.
පරිසර අමාත්යාංශයේ ලේකම් කේ.ආර්. උඩුවාවල සහ ජාතික ජල සම්පත් මණ්ඩලයේ සභාපති ආර්.එම්.එස්. බණ්ඩාර යන මහත්වරුන් ඇතුළු නිලධාරීන් පිරිසක් සහභාගී වූ මෙම උත්සවයේදී අවධාරණය කෙරුණේ, දේශගුණික විපර්යාස හමුවේ ජල සුරක්ෂිතතාව තහවුරු කිරීම රටේ අනාගතයට අතිශය තීරණාත්මක වන බවයි. මෙම වැඩසටහන මගින් සංවේදී ජල මූලාශ්ර ආරක්ෂා කර ගැනීම සඳහා අවශ්ය තාක්ෂණික නිර්දේශ සහ සම්බන්ධීකරණ සහාය අඛණ්ඩව ලබා දීමට නියමිතය.
