ශ්රී ලංකාවේ නාගරික සංවර්ධන ක්රියාවලිය වඩාත් කාර්යක්ෂම, විනිවිදභාවයෙන් යුත් සහ මහජන සහභාගීත්වයෙන් යුතුව පවත්වාගෙන යාම සඳහා නාගරික සංවර්ධන අධිකාරිය (UDA) විසින් නිර්මාණය කරන ලද “Mother Lanka” (motherlanka.uda.lk) නව ඩිජිටල් වේදිකාව අද (2026 මාර්තු 16) නිල වශයෙන් ජනගත කරන ලදී. ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතාගේ ප්රධානත්වයෙන් බත්තරමුල්ල සෙත්සිරිපාය පිහිටි අමාත්යංශ ශ්රවණාගාරයේදී මෙම උත්සවය පැවැත්විණි.
“Mother Lanka” යනු නාගරික සංවර්ධන ව්යාපෘති, සැලසුම් සහ නියාමනයන් පිළිබඳව මහජනතාවට, වෘත්තිකයන්ට සහ විශේෂඥයන්ට සිය අදහස්, යෝජනා සහ ගැටලු භාෂා ත්රිත්වයෙන්ම (සිංහල, දෙමළ, ඉංග්රීසි) ඉදිරිපත් කළ හැකි අන්තර් ක්රියාකාරී වේදිකාවකි. මෙමඟින් ලැබෙන ප්රතිපෝෂණ මත පදනම්ව UDA නිලධාරීන් විසින් කඩිනම් ක්රියාමාර්ග සහ විසඳුම් ලබා දීමට කටයුතු කරනු ඇත. පරිශීලකයන්ගේ රහස්යභාවය සහ අනන්යතාවය සුරක්ෂිත වන පරිදි මෙම පද්ධතිය සකස් කර තිබීම විශේෂත්වයකි.
එළිදැක්වීමේ අවස්ථාවට එක්වූ අමාත්ය බිමල් රත්නායක මහතා ප්රකාශ කළේ, ලෝකයේ බොහෝ රටවල් යුද්ධයෙන් විනාශ වන මොහොතක, ශ්රී ලංකාව ජනතාවගේ ජීවිත පහසු කිරීමටත්, ප්රජාතන්ත්රවාදී අයිතීන් තහවුරු කිරීමටත් ඩිජිටල් තාක්ෂණය යොදා ගන්නා බවයි. නාගරික සංවර්ධන අධිකාරියේ තරුණ හා දක්ෂ කණ්ඩායමක් විසින් නිර්මාණය කරන ලද මෙම වේදිකාව හරහා, රටේ සංවර්ධන ක්රියාවලියට සෘජුවම දායක වීමට සාමාන්ය ජනතාවට සහ විද්වතුන්ට අවස්ථාව ලැබෙන බව ඔහු අවධාරණය කළේය.
මෙම අවස්ථාවට නාගරික සංවර්ධන නියෝජ්ය අමාත්ය එරංග ගුණසේකර මහතා ඇතුළු අමාත්යංශයේ සහ නාගරික සංවර්ධන අධිකාරියේ උසස් නිලධාරීන් රැසක් සහභාගී වූහ. “Mother Lanka” වේදිකාව, ප්රවාහන හා මහාමාර්ග අමාත්යංශය යටතේ ඇති අනෙකුත් ආයතන වෙත ද ඉදිරියේදී ව්යාප්ත කිරීමට රජය සැලසුම් කර ඇත.
