දිවයින පුරා පවතින වියළි කාලගුණය හමුවේ වුවද, දැනට පවතින ජල ධාරිතාව කළමනාකරණය කරගනිමින් ජල විදුලි උත්පාදනය අඛණ්ඩව පවත්වාගෙන යාමට හැකියාව පවතින බව බලධාරීන් ප්රකාශ කරයි. මහවැලි අධිකාරියේ ජල කළමනාකරණ ලේකම් කාර්යාලයේ අධ්යක්ෂ නිලන්ත ධනපාල මහතා සඳහන් කළේ, දැනට මෙරට තුළ දැඩි නියඟයක් පවතින බවට පැවසිය නොහැකි වුවත්, පවතින වියළි ස්වභාවය තවදුරටත් පැවතුණහොත් ඉදිරි මාස කිහිපය තුළ නියඟයක් ඇතිවීමේ අවදානමක් පවතින බවයි. කොත්මලේ වැනි ජලාශවල ජල මට්ටම පහළ බැස තිබුණද, වික්ටෝරියා, රන්දෙණිගල සහ සමනලවැව වැනි ප්රධාන ජලාශ තවමත් ස්ථාවර මට්ටමක පවතින බව ඔහු වැඩිදුරටත් පෙන්වා දුන්නේය.
වාරිමාර්ග දෙපාර්තමේන්තුවේ දත්තවලට අනුව දිවයිනේ ප්රධාන ජලාශ 73ක සමස්ත ජල ධාරිතාව මේ වන විට සියයට 76.74ක මට්ටමක පවතී. අනුරාධපුරය, මහනුවර සහ බදුල්ල වැනි ප්රදේශවල ජලාශ සියයට 90කට වඩා වැඩි ජල මට්ටමක් පෙන්නුම් කළද, මන්නාරම සහ පුත්තලම වැනි ප්රදේශවල ජල මට්ටම සියයට 55-60 දක්වා පහළ බැස තිබීම අවධානයට යොමු විය යුතු කරුණකි. කෙසේ වෙතත්, එළඹෙන අප්රේල් හෝ මැයි මාසවලදී වර්ෂාව ලැබෙනු ඇතැයි බලධාරීන් අපේක්ෂා කරන අතර, එතෙක් කෘෂිකර්මාන්තයට සහ විදුලි උත්පාදනයට අවශ්ය ජලය ප්රවේශමෙන් භාවිත කිරීම වැදගත් බව විශේෂඥයෝ පෙන්වා දෙති.
