හෙට (අප්රේල් 11) දිනයේදී දිවයිනේ උතුරු, උතුරු-මැද, වයඹ, බස්නාහිර, දකුණ සහ නැගෙනහිර පළාත්වලට මෙන්ම මොණරාගල දිස්ත්රික්කයට ද දැඩි උණුසුම් කාලගුණයක් පවතිනු ඇතැයි කාලගුණ විද්යා දෙපාර්තමේන්තුව අනාවැකි පළ කරයි. මෙම ප්රදේශවල මිනිස් සිරුරට දැනෙන උණුසුම හෙවත් ‘තාප දර්ශකය’ (Heat Index) ‘අවධානය යොමු කළ යුතු’ (Caution) මට්ටම දක්වා ඉහළ යා හැකි බව එම නිවේදනයේ සඳහන් වේ. තාප දර්ශකය යනු වාතයේ උෂ්ණත්වය සහ සාපේක්ෂ ආර්ද්රතාවය යන කරුණු දෙකම සලකා බලා මිනිස් සිරුරට දැනෙන සැබෑ උෂ්ණත්වය ගණනය කිරීමකි.
දැඩි හිරු රශ්මියට නිරාවරණය වීමෙන් ශරීරයට අධික තෙහෙට්ටුවක් ඇති විය හැකි අතර, දිගින් දිගටම එළිමහන් කටයුතුවල නිරත වීමෙන් මාංශ පේශි පෙරළීම වැනි තත්ත්වයන් ඇති වීමට ඉඩ තිබේ. මේ නිසා නිතර ජලය පානය කරමින් සිරුරේ ජල මට්ටම නිසි ලෙස පවත්වා ගැනීම, සෘජු හිරු රශ්මියට නිරාවරණය වීම අවම කිරීම සහ වෙහෙසකර එළිමහන් කටයුතු සීමා කරන ලෙස කාලගුණ විද්යා දෙපාර්තමේන්තුව උපදෙස් දෙයි. විශේෂයෙන්ම කුඩා ළමුන්, වැඩිහිටියන් සහ නිදන්ගත රෝගවලින් පෙළෙන පුද්ගලයින් මේ සම්බන්ධයෙන් වඩාත් ප්රවේශම් විය යුතුය. පවතින උණුසුම් කාලගුණයත් සමඟ උත්සව සමයේ සාප්පු සවාරි හෝ වෙනත් එළිමහන් කටයුතුවල නිරත වන විට කුඩයක් හෝ තොප්පියක් භාවිත කිරීම සහ සැහැල්ලු ඇඳුම් ඇඳීමෙන් මෙම තත්ත්වය පාලනය කර ගත හැකිය.
