මැදපෙරදිග කලාපයේ පවතින උග්ර යුදමය වාතාවරණය හේතුවෙන්, එහි රැඳී සිටින ශ්රී ලාංකිකයන් අතරින් හදිසි අවශ්යතා මත මෙරටට පැමිණීමට අපේක්ෂා කරන පිරිස් වෙනුවෙන් විශේෂ වැඩපිළිවෙළක් සකස් කර ඇති බව විදේශ කටයුතු අමාත්යාංශය නිවේදනය කරයි.
විදේශ කටයුතු අමාත්යාංශයේ මාධ්ය ප්රකාශක තුෂාර රොද්රිගෝ මහතා සඳහන් කරන්නේ, මැදපෙරදිග පිහිටි ශ්රී ලංකා තානාපති කාර්යාල හරහා මේ වන විටත් තොරතුරු රැස් කිරීමේ සහ සම්බන්ධීකරණ කටයුතු ආරම්භ කර ඇති බවයි. විශේෂයෙන්ම ගුවන් ගමන් මාර්ගවල පවතින අවදානම් තත්ත්වයන් සහ ගුවන් ගමන් අවලංගු වීම් සැලකිල්ලට ගනිමින්, ලාංකිකයන් ආරක්ෂිතව මෙරටට ගෙන්වා ගැනීමට අවශ්ය විකල්ප මාර්ග පිළිබඳව ද අවධානය යොමු කර තිබේ.
යුද ගැටුම් පවතින කලාපවල සිටින ලාංකිකයන්ගේ ආරක්ෂාව තහවුරු කිරීමටත්, ඔවුන්ට අවශ්ය උපදෙස් ලබා දීමටත් තානාපති කාර්යාලවල පැය 24 පුරා ක්රියාත්මක විශේෂ ඒකක පිහිටුවා ඇති බව ද අමාත්යාංශය වැඩිදුරටත් සඳහන් කරයි.
