දකුණු ආසියානු කලාපීය සහයෝගීතාවයේ නවමු පරිච්ඡේදයක් සනිටුහන් කරමින්, මෙරට සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා බංග්ලාදේශයේ නව අග්රාමාත්ය තාරික් රහ්මාන් මහතා සමඟ ඩකා නුවරදී නිල හමුවක නිරත විය. බංග්ලාදේශයේ 11 වන අග්රාමාත්යවරයා ලෙස ඓතිහාසික සංසද් භබාන් පරිශ්රයේදී දිවුරුම් දුන් තාරික් රහ්මාන් මහතා, සිය ධුරයේ වැඩ භාරගැනීමෙන් අනතුරුව හමුවූ ප්රථම විදේශීය නියෝජිතයන් අතරට අමාත්ය ජයතිස්ස මහතා ඇතුළත් වීම විශේෂත්වයකි.
බංග්ලාදේශ ජාතික පක්ෂයේ නායකත්වයෙන් යුත් නව කැබිනට් මණ්ඩලයේ දිවුරුම් දීමේ උත්සවය සඳහා ශ්රී ලංකා රජය නියෝජනය කරමින් සහභාගී වූ අමාත්යවරයා, අග්රාමාත්ය කාර්යාලයේදී මෙම සුහද සාකච්ඡාව පවත්වා තිබේ. මෙම අවස්ථාවට අග්රාමාත්ය දියණිය සයිමා රහ්මාන් සහ නව අමාත්ය ආචාර්ය කලීලූර් රහ්මාන් ඇතුළු ඉහළ පෙළේ රාජ්ය නිලධාරීන් පිරිසක් ද එක්ව සිටියහ.
දෙරට අතර පවතින දීර්ඝකාලීන මිත්රත්වය තවදුරටත් ශක්තිමත් කරගැනීමත්, විශේෂයෙන්ම සෞඛ්ය සහ ජනමාධ්ය ක්ෂේත්රයන්හි නව සහයෝගීතා අවස්ථා පිළිබඳවත් මෙහිදී දීර්ඝ වශයෙන් අවධානය යොමු විය. කලාපීය දේශපාලනයේ සිදුවන මෙම තීරණාත්මක වෙනස්කම් හමුවේ ශ්රී ලංකාව සහ බංග්ලාදේශය අතර සබඳතා නව උපායමාර්ගික මාවතකට අවතීර්ණ වනු ඇති බව දේශපාලන විචාරකයෝ පෙන්වා දෙති.
මෙම රාජ්යතාන්ත්රික හමුව හරහා දකුණු ආසියානු කලාපය තුළ ශ්රී ලංකාවේ භූමිකාව සහ අසල්වැසි රාජ්යයන් සමඟ පවතින ශක්තිමත් බැඳීම යළිත් වරක් ජාත්යන්තර අවධානයට ලක්ව තිබේ.
