ඉරානය විසින් එක්සත් අරාබි එමීර් රාජ්යය (UAE) ඉලක්ක කර ගනිමින් එල්ල කරන ලද මිසයිල සහ ඩ්රෝන ප්රහාරවලින් සුළු තුවාල ලැබූ පුද්ගලයින් 58 දෙනා අතර ශ්රී ලාංකිකයින් ද සිටින බව එමීර් රාජ්යයේ ආරක්ෂක අමාත්යාංශය තහවුරු කරයි. පෙබරවාරි 28 වැනිදා ආරම්භ වූ මෙම ප්රහාර මාලාවෙන් පුද්ගලයින් තිදෙනෙකු ජීවිතක්ෂයට පත්ව ඇති අතර ඔවුන් පාකිස්ථාන, නේපාල සහ බංග්ලාදේශ ජාතිකයින් බව වාර්තා වේ. තුවාල ලැබූ අනෙකුත් පිරිස අතර එමීර්, ඊජිප්තු, ඉන්දීය, පිලිපීන සහ ශ්රී ලාංකික ඇතුළු විවිධ ජාතීන්ට අයත් ශ්රමිකයින් සිටින බව එමීර් බලධාරීන් නිවේදනය කර ඇත.
පවතින මෙම උණුසුම් තත්ත්වය හමුවේ මැදපෙරදිග වෙසෙන ශ්රී ලාංකිකයින්ගේ ආරක්ෂාව තහවුරු කිරීමට රජය විශේෂ පියවර ගෙන තිබේ. විදේශ කටයුතු අමාත්යාංශය සහ විදේශ සේවා නියුක්ති කාර්යාංශය එක්ව පැය 24 පුරා ක්රියාත්මක හදිසි මෙහෙයුම් මධ්යස්ථාන පිහිටුවා ඇති අතර, එමීර් රාජ්යයේ සිටින ශ්රී ලාංකිකයින්ට සහ ඔවුන්ගේ පවුල්වල සාමාජිකයින්ට සහාය ලබා දීමට කටයුතු සූදානම් කර ඇත. තුවාල ලැබූ ශ්රී ලාංකිකයින්ගේ තත්ත්වය පිළිබඳව එරට පිහිටි ශ්රී ලංකා තානාපති කාර්යාලය සහ කොන්සල් ජනරාල් කාර්යාලය සමීපව නිරීක්ෂණය කරමින් සිටින බව ද වාර්තා වේ.
මැදපෙරදිග කලාපයේ පවතින මෙම අවදානම් සහගත වාතාවරණය හේතුවෙන් එහි වෙසෙන සියලුම ශ්රී ලාංකිකයින්ට අත්යවශ්ය නොවන සංචාරවලින් වැළකී සිටින ලෙසත්, දේශීය ආරක්ෂක අංශ ලබා දෙන උපදෙස් දැඩි ලෙස පිළිපදින ලෙසත් රජය උපදෙස් දෙයි. යම් හදිසි අවස්ථාවක් හෝ තොරතුරක් දැනුම් දීමට අවශ්ය නම් 1989 ක්ෂණික ඇමතුම් අංකය හෝ විදේශ කටයුතු අමාත්යාංශයේ +94742595546 යන අංකය සම්බන්ධ කර ගන්නා ලෙස මහජනතාවගෙන් ඉල්ලා සිටියි.
