එක්සත් රාජධානියේ යෞවනයන් සිය ගණනකගේ සහභාගීත්වයෙන් සමාජ මාධ්ය භාවිතය සීමා කිරීමේ හෝ සම්පූර්ණයෙන්ම තහනම් කිරීමේ විශේෂ පර්යේෂණාත්මක වැඩසටහනක් ආරම්භ කිරීමට එරට රජය තීරණය කර තිබේ. මෙම “ඩිජිටල් ඇඳිරි නීතිය” (Digital curfews) සහ යෙදුම් භාවිත කාල සීමාවන් පැනවීමේ නියමු ව්යාපෘතිය සඳහා යොවුන් වියේ පසුවන්නන් 300ක් සම්බන්ධ කර ගැනීමට නියමිත බව අද (2026 මාර්තු 25) වාර්තා විය.
තාක්ෂණ ලේකම් ලිස් කෙන්ඩල් (Liz Kendall) ප්රකාශ කරන පරිදි, මෙම පරීක්ෂණයේදී තෝරාගත් යෞවනයන්ගේ සමාජ මාධ්ය ගිණුම් සම්පූර්ණයෙන්ම අක්රිය කිරීම, රාත්රී කාලයේදී ඒවා අවහිර කිරීම හෝ දිනකට පැයකට පමණක් භාවිතය සීමා කිරීම වැනි විවිධ ක්රමවේද අත්හදා බලනු ඇත. මෙහි ප්රධාන අරමුණ වන්නේ ඕස්ට්රේලියාව අනුගමනය කරමින් වයස අවුරුදු 16ට අඩු දරුවන්ට සමාජ මාධ්ය තහනම් කිරීමේ නීතියක් පැනවීමට අවශ්ය ප්රායෝගික සාක්ෂි රැස් කර ගැනීමයි.
සමාජ මාධ්ය තහනම පිළිබඳ රජයේ උපදේශන ක්රියාවලිය එළඹෙන මැයි 26 වනදා දක්වා ක්රියාත්මක වන අතර ප්රංශය, ස්පාඤ්ඤය සහ ඉන්දුනීසියාව වැනි රටවල් ද මෙවැනිම තහනම් පැනවීමට අවධානය යොමු කර තිබේ. කෙසේ වෙතත්, ඇතැම් විශේෂඥයින් පෙන්වා දෙන්නේ මෙවැනි තහනම් පැනවීමට වඩා තාක්ෂණික සමාගම් විසින් ඔවුන්ගේ වේදිකාවන් දරුවන්ට ආරක්ෂිත වන ලෙස සකස් කළ යුතු බවයි. NSPCC වැනි ළමා ආරක්ෂක සංවිධාන පවසන්නේ දරුවන්ට හානිකර අන්තර්ගතයන් දර්ශනය වීම වැළැක්වීමට තාක්ෂණික සමාගම් පියවර ගත යුතු අතර මෙම නියමු ව්යාපෘතියෙන් පසු රජය තීරණාත්මක පියවරක් ගත යුතු බවයි.
