මැදපෙරදිග කලාපයේ පවතින යුදමය උණුසුම තවදුරටත් වර්ධනය කරමින්, පර්සියානු ගල්ෆ් කලාපයේ යාත්රා කරමින් තිබූ තවත් නෞකාවකට හඳුනා නොගත් ප්රහාරයක් එල්ල වී ඇති බව එක්සත් රාජධානියේ සමුද්රීය වෙළඳ මෙහෙයුම් මධ්යස්ථානය (UKMTO) වාර්තා කරයි. කටාර් රාජ්යයේ රස් ලෆාන් (Ras Laffan) ප්රදේශයට නැගෙනහිරින් මෙම ප්රහාරය එල්ල වී ඇති අතර, එහි කාර්ය මණ්ඩලය ආරක්ෂිතව පසුවන බව තහවුරු කර තිබේ.
මෙම සිදුවීමට පැය කිහිපයකට පෙර, එනම් බදාදා රාත්රී 11:00 ට පමණ (GMT), ඕමාන් ගල්ෆ් කලාපයේ කෝර් ෆක්කාන් (Khawr Fakkan) වරායට නැගෙනහිරින් ද තවත් නෞකාවකට ප්රහාරයක් එල්ල විය. හෝමුස් සමුද්ර සන්ධියට ආසන්නයේ සිදුවූ එම ප්රහාරයෙන් නෞකාව තුළ ගින්නක් ද හටගෙන තිබුණි. ඊශ්රායලය විසින් ඉරානයේ විශාලතම ගෑස් නිධිය වන ‘සවුත් පාර්ස්’ (South Pars) වෙත එල්ල කළ ප්රහාරයට ප්රතිචාර වශයෙන්, ඉරානය විසින් කටාර්හි රස් ලෆාන් ගෑස් මධ්යස්ථානය වෙත එල්ල කළ රාත්රී ප්රහාරවලින් අනතුරුව මෙම නෞකා ප්රහාර වාර්තා වීම විශේෂත්වයකි.
කටාර් බලධාරීන් පවසන පරිදි රස් ලෆාන් බලශක්ති මධ්යස්ථානයේ හටගත් ගිනි ගැනීම් මේ වන විට පාලනය කර ඇතත්, මුහුදු මාර්ගවල පවතින මෙම අනාරක්ෂිත තත්ත්වය ගෝලීය බලශක්ති සැපයුමට සහ නාවික ගමන් බිමන්වලට දැඩි බලපෑමක් එල්ල කරමින් තිබේ. විශේෂයෙන්ම හෝමුස් සමුද්ර සන්ධිය හරහා සිදුවන තෙල් සහ ගෑස් ප්රවාහනය අඩාල වීම හේතුවෙන් ලෝක වෙළඳපොළේ ඉන්ධන මිල තවදුරටත් ඉහළ යාමේ අවදානමක් පවතී.
