2026 වසරේ අප්රේල් සිට ජුනි දක්වා වන දෙවන කාර්තුව සඳහා විදුලි ගාස්තු සියයට 13.56කින් ඉහළ නැංවීමට ලංකා විදුලිබල මණ්ඩලය ඉදිරිපත් කළ යෝජනාවට වෘත්තීය සමිති ඇතුළු පාර්ශ්ව රැසක් සිය දැඩි විරෝධය පළ කර තිබේ. වෘත්තීය සමිති නියෝජිතයන් චෝදනා කරන්නේ ගල් අඟුරු ගනුදෙනුවලදී සිදුවූ බව කියන මූල්ය වංචාවන් නිසා ඇතිවූ පාඩුව ද සාමාන්ය ජනතාවගේ විදුලි බිලෙන් පියවා ගැනීමට බලධාරීන් උත්සාහ දරන බවයි. මෙම ගාස්තු වැඩිකිරීමේ යෝජනාව මහජන උපයෝගීතා කොමිෂන් සභාව වෙත ඉදිරිපත් කර ඇත්තේ අප්රේල් 01 වැනිදා සිට ක්රියාත්මක වන පරිදිය.
වසරකට සිව්වතාවක් ගාස්තු සංශෝධනය කිරීමේ ප්රතිපත්තියට අනුව, 2026 පළමු කාර්තුව සඳහා ද සියයට 11.57ක ගාස්තු වැඩි කිරීමක් විදුලිබල මණ්ඩලය ඉල්ලා සිටියද, විධිමත් යෝජනාවක් ඉදිරිපත් නොකිරීම හේතුවෙන් මහජන උපයෝගීතා කොමිසම මීට පෙර එම ඉල්ලීම ප්රතික්ෂේප කර තිබුණි. ඒ අනුව දෙවන කාර්තුව සඳහා වන නව යෝජනාව පෙබරවාරි 13 වැනිදාට පෙර ලබාදෙන ලෙස කොමිසම කළ දැනුම්දීමට අනුව මෙම නව මිල සංශෝධනය ඉදිරිපත් කර ඇත.
මහජන උපයෝගිතා කොමිසම සඳහන් කරන්නේ ලංකා විදුලිබල මණ්ඩලයේ මෙම යෝජනාවලිය මේ වන විට සමාලෝචනය කරමින් පවතින බවයි. ඉන් අනතුරුව ඒ සම්බන්ධයෙන් මහජන අදහස් විමසීමේ ක්රියාවලියක් සිදු කිරීමට නියමිත අතර, අවසන් තීරණය ලබා දෙන්නේ එම මහජන අදහස් ද සැලකිල්ලට ගැනීමෙන් පසුවය. ගල් අඟුරු තොග හිඟවීම සහ බලාගාර නඩත්තු කටයුතු හේතුවෙන් පිරිවැය ඉහළ ගොස් ඇති බව විදුලිබල මණ්ඩලයේ ස්ථාවරය වුවද, පවතින ආර්ථික පීඩනය හමුවේ තවත් ගාස්තු වැඩිවීමක් දරාගත නොහැකි බව පාරිභෝගික සංවිධාන අවධාරණය කරයි.
