නැගෙනහිර පළාත් හිටපු ප්රධාන අමාත්ය සිවනේසතුරෙයි චන්ද්රකාන්තන් හෙවත් පිල්ලෙයාන් විසින් ඉදිරිපත් කර ඇති මූලික අයිතිවාසිකම් පෙත්සමක් සම්බන්ධයෙන් ඔහුගෙන් උපදෙස් ලබාගැනීමට ඔහුගේ නීතිඥවරයෙකුට අවස්ථාව සලසා දෙන ලෙස ශ්රේෂ්ඨාධිකරණය අද (06) නීතිපතිවරයාට දැනුම් දුන්නේය.
මෙම නඩුව පිළිබඳ වැදගත් තොරතුරු මෙසේය. ජෝසප් පරරාජසිංගම් මන්ත්රීවරයා ඝාතනය කිරීමේ සිද්ධියට අදාළව 2016 වසරේ තමන්ව අත්අඩංගුවට ගැනීමට එරෙහිව පිල්ලෙයාන් මෙම පෙත්සම ඉදිරිපත් කර තිබුණි. පිල්ලෙයාන් වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා අධිකරණයට දන්වා සිටියේ අදාළ චෝදනාවලින් පිල්ලෙයාන් නිදොස් කොට නිදහස් කර ඇති නමුත්, ඔහු මේ වන විට වෙනත් සිද්ධියක් සම්බන්ධයෙන් ත්රස්තවාදය වැළැක්වීමේ පනත යටතේ අපරාධ පරීක්ෂණ දෙපාර්තමේන්තුව භාරයේ පසුවන බවයි.
ඔහු අත්අඩංගුවේ පසුවන බැවින් මෙම පෙත්සම ඉදිරියට පවත්වාගෙන යාම සඳහා උපදෙස් ලබාගැනීමට මෙතෙක් නොහැකි වී ඇති බව නීතිඥවරයා පෙන්වා දුන්නේය. එහිදී අතිරේක සොලිසිටර් ජෙනරාල්වරයා ප්රකාශ කළේ නීතිඥවරුන් ඉල්ලීමක් කරන්නේ නම් ඒ සඳහා අවශ්ය ප්රවේශය ලබාදිය හැකි බවයි. ඒ අනුව අවශ්ය උපදෙස් ලබාගන්නා ලෙස දැනුම් දුන් විනිසුරු මඩුල්ල පෙත්සම විභාගය ලබන ජූලි මස 28 වනදා දක්වා කල් තැබීමට නියම කළේය.
