මොරටුව කොරළවැල්ල, ජුබිලි පාර මුහුදු වෙරළට කාන්තා මෘත ශරීරයක් ගොඩගසා ඇති බවට මොරටුව පොලිසියට ලද තොරතුරක් මත විශේෂ විමර්ශනයක් ආරම්භ කර තිබේ. මෙලෙස අවාසනාවන්ත ලෙස මියගොස් ඇත්තේ කොරළවැල්ල ප්රදේශයේම පදිංචිව සිටි 34 හැවිරිදි කාන්තාවකි.
මෙම මරණය මනුෂ්ය ඝාතනයක්ද යන්න පිළිබඳව පොලිසිය දැඩි සැකයක් මතු කර ඇති අතර, සිදුකළ මූලික විමර්ශනවලදී අනාවරණය වී ඇත්තේ මියගිය කාන්තාව සහ තවත් පිරිසක් අතර මීට පෙර පුද්ගලික ආරවුලක් පැවති බවයි. එම ආරවුලට සම්බන්ධ බවට සැකකෙරෙන කාන්තාවන් තිදෙනෙකු මේ වන විටත් පොලිස් අත්අඩංගුවට ගෙන ඇත.
සිද්ධිය සම්බන්ධයෙන් මහේස්ත්රාත් පරීක්ෂණය සහ පශ්චාත් මරණ පරීක්ෂණය පැවැත්වීමට නියමිත අතර, මොරටුව පොලිසිය වැඩිදුර විමර්ශන සිදුකරයි.
