බෝල්ටික් මුහුදේ (Baltic Sea) කිලෝමීටර් 12 ක් පමණ දුරකට විහිදුණු දැවැන්ත තෙල් කාන්දුවක් සිදුකිරීම සම්බන්ධයෙන් පරිසර දූෂණ චෝදනා මත යුරෝපා සංගමයේ සම්බාධක ලැයිස්තුවට ඇතුළත් කර තිබූ තෙල් නැවක් පරීක්ෂා කිරීමට ස්වීඩන වෙරළාරක්ෂක බලකාය අද (03) පියවර ගෙන තිබේ. ‘ෆ්ලෝරා 1’ (Flora 1) නැමැති මෙම නෞකාව ස්වීඩනයේ ගොට්ලන්ඩ් (Gotland) දූපතට නැගෙනහිරින් යාත්රා කරමින් සිටියදී මෙලෙස අත්අඩංගුවට ගෙන ඇත.
නෞකා ගමන් මග නිරීක්ෂණ දත්තවලට අනුව, සියෙරා ලියොන් රාජ්යයේ ධජය යටතේ යාත්රා කරන මෙම නෞකාව රුසියාවේ ප්රිමෝර්ස්ක් (Primorsk) තෙල් වරායේ සිට බ්රසීලයේ සැන්ටෝස් බලා ගමන් කරමින් තිබී ඇත. නෞකාව පරීක්ෂා කිරීමේදී එය යුරෝපා සංගමයේ සම්බාධක ලැයිස්තුවට ඇතුළත් කර ඇති බවත්, එහි ධජය ලියාපදිංචි කිරීමේ තත්ත්වය ඇතුළු කරුණු කිහිපයක් සම්බන්ධයෙන් ගැටලු පවතින බවත් ස්වීඩන බලධාරීහු ප්රකාශ කළහ.
මේ වන විට මෙම නෞකාව දකුණු ස්වීඩනයේ යස්ටාඩ් (Ystad) අසල නැංගුරම් පොළක් වෙත ආරක්ෂිතව රැගෙන ගොස් තිබේ. යුක්රේන සහ ඉරාන යුධමය වාතාවරණය හමුවේ රුසියානු තෙල් අපනයනය සම්බන්ධයෙන් පනවා ඇති ජාත්යන්තර සම්බාධක මඟහැරීමට උත්සාහ කරන “අඳුරු නෞකා කණ්ඩායම්” (Shadow fleet) පිළිබඳව යුරෝපීය රටවල් දැඩි අවධානයෙන් පසුවන පසුබිමක මෙම අත්අඩංගුවට ගැනීම සිදුවී ඇත.
