ඕස්ට්රේලියාවේ සිඩ්නි නුවර පොට්ස් පොයින්ට් (Potts Point) ප්රදේශයේ මහල් නිවාස සංකීර්ණයක් තුළට ඇතුළු වී කාන්තාවන් දෙදෙනෙකුට දරුණු ලෙස පහරදුන් පුද්ගලයෙකු නිව් සවුත් වේල්ස් පොලිසිය එල්ල කළ වෙඩි ප්රහාරයකින් ජීවිතක්ෂයට පත්ව තිබේ. අඟහරුවාදා පෙරවරුවේ සිදුවූ මෙම සිද්ධියේදී, සැකකරු මෙල්ල කිරීමට පොලිසිය ප්රථමයෙන් ටේසර් (Taser) තුවක්කු භාවිත කළද එය අසාර්ථක වීම නිසා වෙඩි තැබීමට සිදුවූ බව පොලිස් බලධාරීහු පවසති.
පහරකෑමට ලක්වූ 48 සහ 56 යන වයස්වල පසුවන කාන්තාවන් දෙදෙනා හිසට සහ මුහුණට සිදුවූ තුවාල සහිතව ශාන්ත වින්සන්ට් රෝහලට ඇතුළත් කර ඇත. ඔවුන්ගේ තත්ත්වය බරපතල වුවද මාරාන්තික නොවන බව වාර්තා වේ. මියගිය පුද්ගලයා එම නිවාස සංකීර්ණයේ පදිංචිකරුවෙකු නොවන අතර ඔහු කාන්තාවන්ට හඳුනන අයෙකුද යන්න පිළිබඳව මෙතෙක් අනාවරණය වී නොමැති බව සහකාර පොලිස් කොමසාරිස් පීටර් මැකේනා (Peter McKenna) සඳහන් කළේය.
මෙම සිද්ධියට අමතරව එදිනම පෙරවරුවේ නිව්කාසල් (Newcastle) ප්රදේශයේදී ද වරෙන්තුකරුවෙකු අත්අඩංගුවට ගැනීමට යාමේදී පොලිසිය එල්ල කළ වෙඩි ප්රහාරයකින් පුද්ගලයෙකු තුවාල ලබා තිබේ. එහිදී ද සැකකරු මෙල්ල කිරීමට ටේසර් තුවක්කු භාවිතය අසාර්ථක වී ඇති අතර, මේ නිසා පොලිස් ක්රියාමාර්ග සහ උපකරණවල කාර්යක්ෂමතාව පිළිබඳව ස්වාධීන විමර්ශනයක් ආරම්භ කර ඇත. එසේම ක්වීන්ස්ලන්තයේ (Queensland) බ්රිස්බේන් නුවරදී ද පිහියක් පෙන්වා පොලිසියට තර්ජනය කළ තවත් තරුණයෙකු පොලිස් වෙඩි පහරින් මියගොස් ඇති බව වාර්තා වේ.
