තංගල්ල කොට්ඨාස අපරාධ විමර්ශන කාර්යාංශය විසින් සිදු කළ විශේෂ වැටලීමකදී වියළි ගංජා විශාල තොගයක් සමඟ සැකකරුවන් දෙදෙනෙකු අත්අඩංගුවට ගැනීමට සමත්ව තිබේ. ලුණුගම්වෙහෙර, දෙව්රම්වෙහෙර ප්රදේශයේදී ලොරි රථයකින් ප්රවාහනය කරමින් තිබූ වියළි ගංජා කිලෝග්රෑම් 27 යි ග්රෑම් 161 ක් මුලින්ම පොලිස් භාරයට ගෙන ඇති අතර, ඉන් අනතුරුව සිදු කළ වැඩිදුර විමර්ශනවලදී මොණරාගල, කහම්බාන ප්රදේශයේ හේනක සඟවා තිබූ තවත් ගංජා කිලෝග්රෑම් 350 යි ග්රෑම් 975 ක් සොයා ගැනීමට හැකි වී ඇත. අත්අඩංගුවට ගත් සැකකරුවන් සූරියවැව සහ තිස්සමහාරාම ප්රදේශවල පදිංචි අවුරුදු 38 සහ 48 වයස්වල පසුවන්නන් වන අතර ලුණුගම්වෙහෙර පොලිසිය මේ පිළිබඳව වැඩිදුර විමර්ශන සිදු කරයි.
මැදපෙරදිග පවතින උග්ර යුද අර්බුදය හමුවේ ලෝක වෙළඳපොළේ බොරතෙල් මිල බැරලයකට 103$ දක්වා ඉහළ යාම නිසා ඇති වූ බලශක්ති අර්බුදය කළමනාකරණය සඳහා අද (19) සිට වාහන අංක තහඩුවේ අවසාන ඉලක්කම අනුව ඉන්ධන නිකුත් කිරීමේ නව ක්රමවේදය ක්රියාත්මක වේ. ඒ අනුව අංක තහඩුවේ අවසාන ඉලක්කම ඔත්තේ අංකයක් (1, 3, 5, 7, 9) වන වාහන හිමියන්ට අද දිනයේ QR පද්ධතිය හරහා ඉන්ධන ලබාගත හැකිය. මීට අමතරව ‘Seafrontier’ නෞකාව මගින් රැගෙන ආ ඉන්ධන තොග මේ වන විට දිවයින පුරා බෙදා හරිමින් පවතින අතර, ඉන්ධන පිරිමැසීම සඳහා රජය සෑම බදාදා දිනකම රජයේ සේවකයන්ට නිවාඩු ලබා දීමට ද පියවර ගෙන ඇත.
කාලගුණික තත්ත්වය දෙස බලන විට, දිවයිනේ බොහෝ ප්රදේශවලට අද පස්වරු 1.00 න් පමණ පසුව වැසි හෝ ගිගුරුම් සහිත වැසි ඇති විය හැකි බව කාලගුණ විද්යා දෙපාර්තමේන්තුව පවසයි. විශේෂයෙන් මධ්යම, සබරගමුව සහ ඌව පළාත්වලට මිලිමීටර් 75 ඉක්මවූ තද වැසි ඇති විය හැකි අතර අකුණු අනතුරු පිළිබඳව ද අවධානයෙන් පසුවන ලෙස ජනතාවට දැනුම් දී තිබේ. මේ අතර, ගෝලීය අස්ථාවරත්වය හමුවේ කොළඹ කොටස් වෙළෙඳපොළ ඊයේ ඒකක 521 කින් පහළ බැස ඇති අතර අනුරාධපුරයේදී චීන ජාතිකයන් ඇතුළු විදේශිකයන් 134 ක් අන්තර්ජාල මූල්ය ජාවාරමක් සම්බන්ධයෙන් අත්අඩංගුවට ගෙන ඇත. අත්අඩංගුවේ පවතින මත්ද්රව්ය නඩු විභාග අවසන් වීමට පෙර විනාශ කිරීමට ද මෑතකදී අමාත්ය මණ්ඩල අනුමැතිය හිමි විය.
